بھارت میں کورنا وائرس کی بدترین صورتحال۔۔۔ آئی پی ایل کو ملتوی کر دیا گیا

بھارت میں کورونا وائرس کی بدترین صورتحال کی وجہ سے کرکٹ کے بڑے میلے انڈین پریمیئر لیگ (آئی پی ایل) کو ملتوی کردیا گیا ہے۔

میڈیا رپورٹس کے مطابق بھارتی کرکٹ بورڈ نے ملک میں وباء کی صورتحال کے پیش نظر انڈین پریمیئر لیگ کو فوری طور پر غیر معینہ مدت کے لیے ملتوی کیا ہے، حکام کا کہنا ہے کہ موجودہ صورتحال میں لیگ کے میچز کرانا ممکن نہیں۔

بھارت میں کورونا کے پھیلاؤ اور کھلاڑیوں کے ٹیسٹ مثبت آنے کے باعث گزشتہ روز کلکتہ اور بنگلور کی ٹیموں کے درمیان ہونے والا انڈین پریمیئر لیگ (آئی پی ایل) کا میچ منسوخ کر دیا گیا تھا، آئی پی ایل کھیلنے والے کئی کھلاڑی اب تک کورونا وائرس میں مبتلا ہوچکے ہیں اور متعدد غیر ملکی کھلاڑی بھی لیگ سے علیحدگی اختیار کرچکے ہیں۔

میڈیا رپورٹس کے مطابق جن کھلاڑیوں کے کورونا ٹیسٹ مثبت آئے ہیں ان میں ورن چکرورتی اور سندیپ واریرز شامل ہیں اور دونوں کھلاڑیوں کو اس وقت کورونا ہوا جب وہ انجری کے باعث میڈیکل چیک اپ کے لیے باہر گئے تھے۔