جے آئی ٹی نے عمران خان کو 9 مئی پرتشدد واقعات کی تحقیقات کیلئے طلب کرلیا

لاہور: جناح ہاؤس اور عسکری ٹاور میں جلاؤ گھیراؤ سمیت 9 مئی کے پرتشدد واقعات کی تحقیقات کیلئے قائم جے آئی ٹی نے سابق وزیراعظم عمران خان کو تیس مئی کو 4 بجے طلب کر لیا۔

ذرائع کے مطابق مشترکہ تحقیقاتی ٹیم نے جناح ہاؤس اور عسکری ٹاور میں جلاؤ گھیراؤ سمیت دیگر مقامات پر پرتشدد واقعات کی تحقیقات کے سلسلے میں طلب کر لیا۔ جے آئی ٹی کی سربراہی ڈی آئی جی کامران خان کر رہے ہیں۔

ذرائع کا کہنا ہے کہ پاکستان تحریک انصاف کے چیئرمین اور سابق وزیراعظم عمران خان کو ڈی آئی جی انویسٹی گیشن آفس قلعہ گجر سنگھ لاہور میں طلب کیا گیا ہے جہاں جے آئی ٹی عمران خان سے 9 مئی کے واقعات کے بارے میں تفتیش کرے گی۔

واضح رہے کہ 9 مئی کے واقعات پر پنجاب حکومت نے 10 مختلف جے آئی ٹیز بنائی تھیں، عمران خان تھانہ سرور روڈ، شادمان اور ریس کورس سمیت دیگر تھانوں میں درج ہونے والے مقدمات میں نامزد ہیں۔