مقبوضہ جموں و کشمیر کی سابق وزیراعلیٰ محبوبہ مفتی گھر میں نظر بند

سری نگر: غیرقانونی طور پر بھارت کے زیرقبضہ جموں و کشمیر میں قابض انتظامیہ نے  پیپلز ڈیموکریٹک پارٹی کی صدر محبوبہ مفتی کو سرینگر میں ان کی رہائش گاہ میں نظربند کر دیا ہے۔

کشمیر میڈیا سروس کے مطابق محبوبہ مفتی نے ایک ٹویٹ میں کہاہے کہ قابض حکام نے انہیں گزشتہ روز بڈگام میں ایک حملے میں ہلاک ہونے والے کشمیری پنڈت کے سوگوار اہلخانہ سے اظہار تعزیت کیلئے جانے سے روکنے کیلئے گھر میں نظربند کردیا ہے۔

محبوبہ مفتی نے کہاکہ وہ اپنے تحفظ میں ناکامی پر بھارتی حکومت کے خلاف احتجاج کرنے والے کشمیری پنڈتوں سے اظہار یکجہتی کیلئے بڈگام جانا چاہتی تھی، کیونکہ کشمیری مسلمان اور پنڈت ایک دوسرے کے دکھ درد کو سمجھتے ہیں، تاہم انہیں گھر میں نظر بند کر دیا گیا ہے۔

واضح رہے کہ گزشتہ روز نامعلوم مسلح افراد نے تحصیل دفتر چاڈورہ کے ملازم کشمیری پنڈت راہل بٹ کو دفتر کے احاطے میں فائرنگ کرکے شدیدزخمی کر دیا تھا جو بعد ازاں ہسپتال میں زخموں کی تاب نہ لاتے ہوئے چل بسا تھا۔