آمریت کے مہرے نے جمہوریت کو دفن کردیا، مولانا فضل الرحمان

پی ڈی ایم کے سربراہ مولانا فضل الرحمان نے کہا ہے کہ آج ملک میں جمہوریت نہیں بلکہ آمریت کے مہرے نے جمہوریت کو دفن کردیا ہے۔ مولانا فضل الرحمان نے کہا کہ 13 دسمبر لاہور کا تاریخی دن ہوگا، حکومت عوامی سیلاب کو روک نہیں پائے گی۔ ہمارا راستہ روکا گیا تو ہم نیا راستہ بنا لیں گے۔

اسلام آباد میں بلاول بھٹو زرداری اور مریم نواز کے ہمراہ میڈیا سے  گفتگو کرتے ہوئے مولانا فضل الرحمان نے کہا کہ موجودہ حکومت کو آئینی اور جمہوری نہیں مانتے، موجودہ اسمبلیوں کے ذریعے سینیٹ کے الیکشن جعلی ہوں گے۔

اس موقع پر بلاول بھٹو زرداری نے کہا کہ پیپلز پارٹی نے ہر آمرانہ دور میں مقابلہ کیا، پیپلزپارٹی کی سیاست سڑکوں پر ہی شروع ہوئی تھی، حکمرانوں کو گھر بھجوانے کے لئے مکمل طور پر تیار ہیں اورپی ڈی ایم میں شامل تمام جماعتیں ایک پیج اور ایک اسٹیج پر ہیں۔

بلاول بھٹو  زرداری نے کہاکہ ہم عمران خان اور ان کے سہولت کاروں کو گھر بھیجنے کے لئے نکلے ہیں اور  اس مقصد  کے لیے تمام پارلیمانی اور جمہوری آپشن استعمال کریں گے، استعفے بھی اس عمل میں شامل ہیں۔مسلم لیگ نون کی   سینئیر نائب  صدرمریم نواز کاکہناتھا کہ 13 دسمبر کا جلسہ مینار پاکستان پر ہی ہوگا، جلسے کا مقام کسی صورت تبدیل نہیں کریں گے۔