پنجاب پولیس نے موٹروے پر خاتون سے زیادتی کرنے والے دونوں ملزمان کا سراغ لگا لیا

لاہور سیالکوٹ موٹروے پر خاتون سے زیادتی کرنے والے ایک ملزم کا ڈی این اے میچ کرگیا جب کہ دوسرے ملزم کی شناخت ہوگئی ہے۔

پنجاب پولیس نے موٹروے زیادتی کیس میں ملوث دونوں ملزمان کا سراغ لگا لیا ہے۔ عابد علی کے ڈی این اے میچ کئے جانے کی تصدیق کے بعد دوسرے ملزم کی  شناخت وقارالحسن شاہ کے نام سے ہوئی ہے۔ ملزم شیخوپورہ کے علاقے قلعہ ستار شاہ کا رہائشی ہے، ملزمان عابد اور وقار نے پنجاب کے مختلف اضلاع میں دوران ڈکیتی زیادتی کی وارداتیں  کی ہیں۔

اس سے قبل ایک شخص کا پروفائل ڈی این اے میچ ہونے کی تصدیق کی گئی تھی، ملزم کی شناخت عابد علی کے نام سے ہوئی اور جس کے بارے میں پتہ چلا ہے کہ وہ عادی مجرم ہے اور بہاولنگر کے شہر فورٹ عباس کا رہائشی ہے۔کرمنل ڈیٹا بیس میں عابد علی کا ریکارڈ 2013 سے موجود تھا۔

عابد اشتہاری مجرم ہے اور اس کی وارداتوں کا ریکارڈ موجود ہے۔ ملزم کی عمر 27 سال اور تاریخ پیدائش 22 مئی 1993 ہے۔ عابد علی کی گرفتاری کے لئے محکمہ انسداد دہشت گردی (سی ٹی ڈی) چھاپے مار رہی ہے، تاہم وہ تاحال قانون کی گرفت سے آزاد ہے۔عابد علی نے 2013 میں بھی فورٹ عباس میں چار ساتھیوں کے ساتھ ایک گھر میں گھس کر ڈکیتی کی اور اسلحہ کے زور پر ماں بیٹی سے اجتماعی زیادتی کی تھی جس کا مقدمہ فورٹ عباس میں درج کیا گیا تھا۔

وزیراعظم کے معاون خصوصی برائے سیاسی روابط  ڈاکٹر شہباز گل نے بھی ڈین این اے میچ ہونے کی تصدیق کرتے ہوئے اللہ کا شکر ادا کیا۔ انہوں نے کہا کہ وزیراعلی پنجاب عثمان بزدار، آئی جی پنجاب، سی سی پی او لاہور اور پوری پولیس ٹیم کو مبارک باد دیتے ہوئے کہا کہ ڈی این اے میچ کرگیا، انشاللہ جلد ملزم کی گرفتاری بھی ہوگی، ہمارا کام بولتا ہے الفاظ نہیں۔

واضح رہے کہ گجر پورہ کے علاقے میں موٹروے پرانسانیت سوز واقعہ سامنے آیا جہاں پر گوجرانوالہ کی رہائشی خاتون ڈیفنس میں اپنی بہن سے ملنے کے لیے لاہور آئی تھیں۔ واپسی کے دوران ثناء کی کارکا پیٹرول ختم ہوگیا، انہوں نے اپنے عزیز کو اطلاع کردی اور وہ مددکے انتظار میں گاڑی سے اتر کر کھڑی ہوگئیں۔

اس دوران دو مشکوک افراد خاتون کی جانب آئے، جنہیں دیکھ کرخاتون اپنے بچوں کے ساتھ گاڑی میں محصورہوگئی۔ ڈاکوؤں نے خاتون کوشیشے کھولنے کے لیے کہا جب خاتون نے شیشے نہ کھولے تو ڈاکوؤں نے شیشے توڑ کر گن پوائنٹ پر اس کو گاڑی سے اتار کر کیرول گھاٹی میں واقع کھیتوں میں لے جا کر زیادتی زیادتی کا نشانہ بنایا۔