کینیڈا میں دہشت گردی، پاکستانی نژاد مسلم خاندان کے4 افراد قتل، بچہ شدید زخمی

کینیڈا کی ریاست اونٹاریو میں ایک نوجوان نے مسلمان خاندان پر ٹرک چڑھا دیا جس کے نتیجے میں 4 افراد جاں بحق ہوگئے۔

غیر ملکی خبر رساں ادارے کے مطابق کینیڈا کی ریاست اونٹاریو کے شہرلندن میں ایک 20 سالہ نوجوان نیتھینیل ویلٹمین نے مسلمان خاندان پر ٹرک چڑھا دیا جس کے نتیجے میں اس خاندان کے چاروں افراد موقع پر جاں بحق ہوگئے جب کہ ایک 9 سالہ بچہ شدید زخمی ہوا۔

کینیڈین پولیس کا کہنا ہے کہ ملزم نیتھینیل ویلٹمین کو گرفتار کرلیا ہے، اس نے جان بوجھ کر فٹ پاتھ پر انتظار میں کھڑے خاندان پرحملہ کیا جب کہ ملزم کا یہ اقدام مذہبی منافرت پر مبنی تھا۔ لندن فری پریس کے مطابق جاں بحق ہونے والوں میں 46 سالہ سید افضال، ان کی 44 سالہ اہلیہ  مدیحہ سلمان، 15 سالہ بیٹی یمنیٰ افضال اور سید افضال کی 74 سالہ والدہ شامل ہیں جب کہ حادثے میں زندہ بچ جانے والے سید افضال کے 9 سالہ بیٹے فائز افضال شدید زخمی ہیں جن کو طبی امداد فراہم کی جا رہی ہے، سید افضال کا خاندان 14 سال قبل پاکستان سے کینیڈا منتقل ہوا تھا۔

کینیڈا کے وزیراعظم جسٹن ٹروڈو نے واقعے کی شدید الفاظ میں مذمت کرتے ہوئے کہا کہ آپ یہ جان لیں ہم لندن سمیت پورے ملک کی مسلم کمیونٹی کے ساتھ کھڑے ہیں، انہوں نے کہا کینیڈا میں اسلاموفوبیا کیلیے کوئی جگہ نہیں اور یہ نفرت قابل مذمت ہے، اسے روکنا ہوگا۔

جسٹن ٹروڈو کا کہنا ہے کہ لندن سے موصول ہونے والی خبروں سے گھبرا گیا ہوں اور ان لوگوں کے پیاروں کو جو نفرت انگیز حرکتوں سے گھبرائے ہوئے تھے ان کیلیےحاضر ہوں، انہوں نے کہا کہ ہم اس زخمی بچے کیلیے حاضر ہیں جو کہ اسپتال زیر علاج ہے اور کہا کہ جیسے ہی تم صحت یاب ہوجاؤ گے ہمیں یاد رہو گے۔

کینیڈا کی مسلم تنظیموں نے واقعے کو دہشت گردی قرار دینے  کا مطالبہ کیا ہے، حکام کے مطابق مقدمے میں دہشت گردی کی دفعات شامل کرنے پر غور کیا جا رہا ہے، واقعے کے خلاف سوشل میڈیا پر بھی شدید ردعمل سامنے آ رہا ہےعوام کا کہنا ہے کہ انہیں نا بتایا جائے کہ کینیڈا  میں اسلاموفوبیا کا وجود نہیں ہے۔