نواز شریف باہر بیٹھ کر فوج کو آرمی چیف کیخلاف بغاوت پراُکسا رہے ہیں، وزیراعظم

وزیراعظم عمران خان نے کہا ہے کہ نواز شریف بیرون ملک بیٹھ کر فوج کو آرمی چیف جنرل قمر جاوید باجوہ اور ڈی جی آئی ایس آئی لیفٹیننٹ جنرل فیض حمید کے خلاف بغاوت کرنے کیلئے اکسا رہے ہیں۔

خیبرپختونخوا کے عوام کے لئے صحت کارڈ پلس پروگرام کی سوات میں منعقدہ افتتاحی تقریب سے خطاب کرتے ہوئے وزیراعظم عمران خان نے کہا کہ ریاست مدینہ 2 اصولوں پر قائم تھی جس میں سے پہلا فلاحِ انسانیت کا نظام اور دوسرا قانون کی بالادستی تھا، تحریک انصاف کی حکومت پاکستان کو حقیقی معنوں میں فلاحی ریاست بنانے اور قانون کی عملداری کے لئے ہر ممکن کوشش کرے گی۔

اپنی بات جاری رکھتے ہوئے وزیراعظم نے کہا کہ اس وقت پاکستان میں ڈرامہ ہورہا ہے، سارے بڑے بڑے ڈاکو اکٹھے ہوگئے ہیں، آپ کے گھر میں کوئی ڈاکہ مار کر ساری چیزیں لوٹ لے تو گھر بچانے، کھانے پینے، علاج اور تعلیم کے لیے قرضے لینے پڑتے ہیں، جب مقروض گھر والا ڈاکوؤں کو پکڑ کر پیسہ واپس مانگتا ہے تو ڈاکو کہتے ہیں کہ ہم قانون سے بالاتر ہیں پیسہ واپس نہیں کریں گے۔

عمران خان نے کہا کہ نواز شریف نے لندن جانے کے لئے اداکاری کی، اس کی شکل دیکھ کر حکومت کیا عدالتوں کو بھی اس پر ترس آگیا، عورتیں اس کی شکل دیکھ کر رونے لگتی ہیں، سب نے کہا کہ اسے علاج کے لئے باہر جانے دو لیکن اس وقت میں نے عدالتوں سے کہا کہ کم از کم 7 ارب تو رکھ لو کیونکہ یہ پیسے کا پجاری ہے۔

وزیراعظم نے کہا کہ این آر او لینے کی کوشش میں نواز شریف اور ان کی بیٹی چپ رہے، لیکن جب انہیں یقین ہو گیا کہ عمران خان این آر او نہیں دینے والا، اس نے بیرون ملک سے گیم شروع کردیا، پاک فوج اور عدلیہ پر حملے شروع کردیے، فوج سے کہہ رہا ہے کہ اپنے آرمی چیف اور آئی ایس آئی چیف کو بدلو، یعنی فوج کو کہہ رہا ہے کہ بغاوت کردو، نوازشریف گیدڑوں کی طرح باہر بیٹھ کر بات کر رہا ہے، یہ ملک میں فیصلہ کن وقت ہے۔

اپنی بات جاری رکھتے ہوئے عمران خان کا کہنا تھا کہ نواز شریف صرف اپنا پیسہ بچانے کےلیے لندن میں بیٹھ کر فوج کو آرمی چیف جنرل قمر جاوید باجوہ کے خلاف بغاوت پر اکسا رہا ہے، اس سے بڑا ملک دشمن کون ہوسکتا ہے۔نواز شریف کی بیٹی بھی وہی بات کررہی ہے، ملکی اداروں کے خلاف جیسی زبان استعمال کی گئی کوئی اور ملک ہوتا تو مریم کو جیل میں ڈال دیتے۔

انہوں نے کہا کہ نوازشریف نے آصف زرداری کو دو بار جیل میں ڈالا، نوازشریف پر کیس زرداری نے بنائے، آج دونوں اکٹھے ہو کر این آر او مانگ رہے ہیں، مشرف نے نوازشریف، آصف زرداری کو این آراو دے کر بڑا ظلم کیا، اس کے بعد ان لوگوں نے پاکستان کا قرضہ چار گنا بڑھایا تھا، وہ جو مرضی کریں میں انہیں این آر او نہیں دوں گا، جس دن میں نے اپنی کرسی بچانے کیلئے ان ڈاکوؤں کو این آر او دیا میں اس دن اپنے ملک سے سب سے بڑی غداری کروں گا۔