پاک،ایران وزرائے خارجہ ملاقات،دہشت گردی کے خلاف اعلیٰ سطح کمیشن قائم کرنے کا فیصلہ

پاکستان اور ایران نے دہشت گردی کے خلاف اعلیٰ سطح کا کمیشن قائم کرنے کا فیصلہ کیاہے۔اسلام آباد میں نگراں وزیر خارجہ جلیل عباس جیلانی اور ایرانی وزیرخارجہ حسین امیرعبداللہیان نے ملاقات کے بعد مشترکہ پریس کانفرنس کی ۔

 وزرائے خارجہ نے باتایاکہ دونوں ملکوں نے اعلیٰ سطح کا کمیشن قائم کرنے کا فیصلہ کیا ہے۔دونوں ممالک کے وزرائے خارجہ اس میں شامل ہوں گے۔ دہشت گردی سے متعلق ایک دوسرے کے خدشات کو دور کیا جائے گا۔

ایرانی وزیرخارجہ حسین امیرعبداللہیان کا کہنا تھا کہ ماضی میں دونوں ممالک کے درمیان کبھی علاقائی تنازع نہیں رہا۔ ہم پاکستان کی سلامتی اور خود مختاری کا احترام کرتے ہیں۔ پاکستان اور ایران میں دہشتگردوں کو موقع نہیں دیں گے۔ دہشت گردوں نے پاکستان اور ایران کو بہت نقصان پہنچایا ہے۔ تجارت کے فروغ کے لیے بارڈر فوری طور پر کھولنے کا فیصلہ کیا ہے۔

نگراں وزیرخارجہ جلیل عباس جیلانی کا کہنا تھا کہ تربت اور زاہدان میں رابطہ افسر مقرر کیے جائیں گے۔ ریاست کی خود مختاری اوراحترام ضروری ہے۔ دہشت گردی دونوں ممالک کا مشترکہ مسئلہ ہے۔ایران کے ساتھ اعلی سطح کے رابطے ہیں اور غلط فہمی پر قابو پا لیاگیا ہے۔

 دونوں ملکوں نے امن اور خوشحالی کے لیے مل کر کام کرنے پر بھی اتفاق کیا۔ مشترکہ چیلنجز سے نمٹنے کے لیے باہمی احترام کو قائم رکھتے ہوئے اجتماعی کوششیں کی جائیں گی ۔