پاکستان نے بنگلادیش کو 11 رنز سے شکست دے کر ایشیا کپ فائنل میں جگہ بنا لی، بھارت سے تاریخی ٹاکرا اتوار کو ہوگا

ایشیا کپ سپر فور مرحلے کے دبئی انٹرنیشنل کرکٹ اسٹیڈیم میں کھیلے گئے اہم میچ میں پاکستان نے بنگلادیش کو سنسنی خیز مقابلے کے بعد 11 رنز سے شکست دی۔ ٹاس بنگلادیش کے کپتان ذاکر علی نے جیت کر پاکستان کو پہلے بیٹنگ کی دعوت دی۔
پاکستان کی ٹیم مقررہ 20 اوورز میں 8 وکٹوں کے نقصان پر 135 رنز بنا سکی۔ محمد حارث 31 رنز کے ساتھ نمایاں رہے۔ دیگر بیٹسمینوں میں فخر زمان 13، سلمان علی آغا 19، محمد نواز 25، حسین طلعت 3، اور شاہین شاہ آفریدی نے 13 گیندوں پر 19 رنز بنائے۔

ابتدائی نقصان اور مشکلات

پاکستان کے اوپنرز فخر زمان اور صاحبزادہ فرحان میدان میں اترے مگر محض 4 رنز کے مجموعی اسکور پر فرحان 4 رنز بنا کر آؤٹ ہوگئے۔ صائم ایوب بغیر کھاتہ کھولے پویلین لوٹ گئے، جس سے پاکستانی اننگز دباؤ میں آ گئی۔

بنگلادیش کا ہدف کا تعاقب

136 رنز کے ہدف کے تعاقب میں بنگلادیشی ٹیم بھی مشکلات کا شکار رہی اور مقررہ 20 اوورز میں 9 وکٹوں پر صرف 124 رنز ہی بنا سکی۔ شمیم حسین 30 رنز کے ساتھ ٹاپ اسکورر رہے۔ دیگر بیٹسمینوں میں سیف حسن 18، نور الحسن 16، مہدی حسن 11، ذاکر علی 5، تنظیم حسن 10 اور تسکین احمد 4 رنز بنا سکے۔

پاکستانی باؤلرز کا شاندار کھیل

پاکستان کی جانب سے شاہین شاہ آفریدی اور حارث رؤف نے شاندار باؤلنگ کرتے ہوئے تین، تین وکٹیں حاصل کیں۔ صائم ایوب نے دو جبکہ محمد نواز نے ایک کھلاڑی کو پویلین کی راہ دکھائی۔

بنگلادیشی باؤلرز کی کارکردگی

بنگلادیش کے باؤلرز نے بھی اچھی گیند بازی کی۔ تسکین احمد نے 3 وکٹیں جبکہ رشاد حسین اور مہدی حسن نے 2، 2 کھلاڑی آؤٹ کیے۔

تاریخی فائنل کی تیاری

اس جیت کے ساتھ پاکستان ایشیا کپ کے فائنل میں پہنچنے والی دوسری ٹیم بن گئی ہے۔ اب فائنل میں پاکستان اور بھارت کی ٹیمیں پہلی مرتبہ آمنے سامنے ہوں گی، جو کرکٹ شائقین کے لیے ایک بڑا اور تاریخی موقع ہوگا۔ یہ میچ اتوار کو کھیلا جائے گا اور شائقین اس روایتی حریفوں کے درمیان سخت مقابلے کے منتظر ہیں۔