پاکستان انٹرنیشنل کرکٹ کے لئے بہترین جگہ ہے، مریم اورنگزیب

اسلام آباد : برطانوی ہائی کمشنر کرسچن ٹرنر نے پاکستان اور انگلینڈ کی کرکٹ ٹیموں کے اعزاز میں عشائیہ دیا۔

وفاقی وزیر اطلاعات مریم اورنگزیب نے بھی شرکت کی۔ان کا کہنا تھا کہ پاکستان انٹرنیشنل کرکٹ کے لئے بہترین جگہ ہے۔پاکستان اور انگلینڈ کے درمیان 17 سال بعد تاریخی ٹیسٹ سیریز کے لئے پوری قوم پرجوش ہے۔اچھے کھیل کے منتظر ہیں۔

عشائیہ کے موقع پر انگلینڈ کرکٹ ٹیم کے کپتان بین اسٹوکس اور پاکستان کرکٹ ٹیم کے کپتان بابر اعظم نے وفاقی وزیر اطلاعات سے ملاقات کی۔وزیر اطلاعات نے انگلینڈ کرکٹ ٹیم کا پاکستان آمد پر خیرمقدم کرتےہوئے کہا کہ پاکستان میں کرکٹ کا جنون ہے، پوری دنیا جانتی ہے کہ پاکستانی عوام کس طرح کرکٹ سے والہانہ لگاﺅ رکھتے ہیں۔حکومت پاکستان انگلینڈ کرکٹ ٹیم کو بہترین سیکورٹی فراہم کر رہی ہے۔

وفاقی وزیر اطلاعات نے حالیہ ٹی ٹوینٹی ورلڈ کپ میں پاکستان اور انگلینڈ کرکٹ ٹیموں کی کارکردگی کو سراہا۔۔۔بین اسٹوکس کا کہنا تھا کہ بہترین مہمان نوازی پر پاکستان کے عوام کے مشکور ہیں۔۔۔سیکورٹی تسلی بخش ہے، بہترین کرکٹ کھیلنے کیلئے پرامید ہیں۔اس موقع پر قومی کرکٹ ٹیم کے کپتان بابر اعظم نے کہا کہ انگلینڈ کرکٹ ٹیم کو خوش آمدید کہتے ہیں۔