پاکستان دیوالیہ نہیں ہوگا، آئی ایم ایف پاکستان کو 4 ارب ڈالر فراہم کرے گا، مفتاح اسماعیل

اسلام آباد : وزیر خزانہ ڈاکٹر مفتاح اسماعیل نے کہا ہے کہ رواں مالی سال آئی ایم ایف پاکستان کو 4 ارب ڈالر دے گا اور پاکستان کو آئی ایم ایف نے ایک سال میں 4 ارب ڈالر کبھی نہیں دیئے۔ پاکستان اور امدادی دوستوں اور اداروں کا اعتماد حاصل ہے، پاکستان دیوالیہ نہیں ہوگا، آئی ایم ایف بھی پاکستان کو دیوالیہ ہونے نہیں دے گا۔

اسلام آباد میں نجی ٹی وی چینل سے غیر رسمی بات چیت کرتے ہوئے وزیرخزانہ مفتاح اسماعیل نے کہا کہ امدادی ملک کی حمایت حاصل ہے اور حالات بہت جلد بہتر ہونے والے ہیں۔ عمران خان کے بیانات ڈالر مقابلے روپے کی اچانک بے قدری کا سبب ہیں۔ مفتاح اسماعیل نے کہاکہ آئی ایم ایف کے ساتھ پروگرام طے ہوچکا ہے اور قرض بحال ہوچکا ہے۔ عالمی بینک اور ایشیائی ترقیاتی بینک بھی فنڈز دیں گے۔ سعودی عرب کی جانب سے اچھی خبریں جلد آجائیں گی۔ آئی ایم ایف کی شرائط پر مشکل فیصلے کئے۔

مفتاح اسماعیل نے نجی ٹی وی چینل سے گفتگو میں کہا کہ وزیراعظم شہباز شریف نے ریاست کو سیاست پر ترجیح دی۔ پاکستان نے آئی ایم ایف کی شرائط پر پٹرولیم مصنوعات کی قیمتیں بڑھائی اور آئی ایم ایف کی جو شرائط تھی وہ مان لی ہیں اب آئی ایم ایف راضی ہو گیا ہے۔ آئی ایم ایف کا وعدہ ہے پاکستان کو معاشی میدان میں گرنے نہیں دیا جائے گا۔ وزیر خزانہ نے کہا کہ جلد ہی عالمی بنک، ایشیائی ترقیاتی بنک اور مالیاتی ادارے بھی پاکستان کو فنڈز دیں گے۔ بیرونی ادائیگیوں اور درآمدی بل میں اضافہ کی وجہ سے پاکستانی کرنسی پر دباؤ ہے۔ رواں ماہ کے دوران ابھی تک درآمدی بل 2.60 ارب ڈالر ریکارڈ ہوا۔ درآمدی بل میں کمی کے باعث روپیہ پر پریشر میں کمی ہوگی۔ گزشتہ ماہ کی نسبت کرنٹ اکاؤنٹس خسارہ دو ارب ڈالر سے کم ہو کر ایک ارب ڈالر رہ جائے گا۔ مفتاح اسماعیل کا کہنا تھا کہ رواں سال اگست میں ایگزیکٹو بورڈ کی منظوری کے بعد آئی ایم ایف سے پیسے ریلیز ہو جائیں گے۔ ملک پر قرضوں کے بوجھ کے باعث معاشی میدان میں مشکلات کا سامنا ہے۔ آئی ایم ایف کو سستا پٹرول اور سستا ڈیزل سکیم پر کوئی اعتراض نہیں  ہے۔