پاکستانی معیشت میں بہتری، روپیہ مستحکم، کرنٹ اکاؤنٹ خسارہ 15 سال بعد سرپلس

وزارت خزانہ نے مالی سال کی ماہانہ مالیاتی کارکردگی رپورٹ جاری کردی ہے جس کے مطابق رواں مالی سال جولائی تا اکتوبر معیشت میں بہتری، ڈالر کے مقابلے روپیہ مستحکم، کرنٹ اکاؤنٹ خسارہ  15 سال بعد ختم ہوکر مثبت ہوگیا۔

وزارت خزانہ کی ملکی معیشت پر ماہانہ اپ ڈیٹ آوٹ لُک رپورٹ کے مطابق ملکی معیشت کے کئی شعبے بہتری کی راہ پر گامزن ہے۔ رواں مالی سالی کے پہلے چار ماہ میں بجٹ خسارہ 484 ارب روپے تک پہنچ گیا۔ کاروباری طبقے،صارفین کا اعتماد بحال، معاشی شرح نمو میں بہتری متوقع ہے۔

رپورٹ میں کہا گیا ہے کہ پاکستانی ترسیلات زر 26.5 فیصد اضافے سے 9.4 ارب ڈالرتک پہنچ گئی ہیں۔ وزارت خزانہ کی دستاویزکے مطابق مالی سال کے4 ماہ میں کرنٹ اکاونٹ 1 ارب 20 کروڑ ڈالرسرپلس رہا اورکرنٹ اکاؤنٹ بیلنس جی ڈی پی کا1.3فیصدسرپلس رہا۔

وزارت خزانہ کی رپورٹ کے مطابق برآمدات میں 10.3 فیصداور درآمدات میں 4 فیصد کمی رہی،تجارتی خسارہ 4 فیصد اضافے سے 6.7 ارب ڈالر رہا۔ زرمبادلہ ذخائر 20ارب 55 کروڑ ڈالرز سے تجاوز کرگئے۔ جولائی سے اکتوبر ٹیکس ریونیو 1340 ارب اور نان ٹیکس ریونیو 356 ارب روپے رہا جبکہ حکومتی اخراجات 1 ہزار 963 ارب روپے رہے۔