مشترکہ مفادات کونسل نے ساتویں مردم شماری کی منظوری دے دی

اسلام آباد:مشترکہ مفادات کونسل نے ساتویں مردم شماری کے انعقاد کی منظوری دے دی ۔ مانیٹرنگ کمیٹی بھی قائم کی جائےگی جو مردم شماری سرگرمیوں کی نگرانی کرے گی۔ مردم شماری سے قبلخانہ شماری ہوگی۔

وزیر اعظم عمران خان کی زیر صدارت مشترکہ مفادات کونسل کااجلاس ہوا جس میں وزرائے اعلیٰ ، وفاقی وزراء سمیت اعلیٰ حکام کی شرکت کی ۔ اجلاس کے اعلامیے کے مطابق مشترکہ مفادات کونسل نے ساتویں مردم شماری کے انعقاد کی منظوری دے دی ہے ۔مردم شماری مانیٹرنگ کمیٹی بھی قائم کی جائےگی جو مردم شماری سرگرمیوں کی نگرانی کرے گی۔ مردم شماری جی آئی ایس مانیٹرنگ سسٹم کے ذریعے ہوگی۔

 اجلاس میں کراچی کے لیے پانی کی اضافی ضروریات پر بھی غور کیا گیا اور سیاسی اور تکنیکی سطح پر صوبوں کے موقف اور پانی سے متعلق مسائل پر مفاہمت کے لیے کمیٹی قائم کرنے کا فیصلہ کیا گیا۔کمیٹی کراچی کے لیے پانی کی اضافی ضروریات کے معاملے کو دیکھے گی۔ اجلاس نے مالی سال 2020-21 کے لیے مشترکہ مفادات کونسل کی سالانہ رپورٹ کی بھی منظوری دی۔

وزیراعظم نے مشترکہ مفادات کونسل کے مستقل سیکرٹریٹ کے قیام پر ارکان کو مبارکباد دیتے ہوئے کہاکہ مستقل سیکرٹریٹ وفاقی اور صوبائی حکومتوں کے درمیان باہمی تعاون کے جذبے کو ظاہر کرتا ہے جو موثر رابطہ کاری میں سہولت فراہم کرے گا۔وفاقی حکومت تمام وفاقی اکائیوں اور اسٹیک ہولڈرز کی مشاورت سے قومی مسائل کے حل کے لیے پرعزم ہے۔