مساجد کسی صورت بند نہیں کی جاسکتیں، ایس او پیز پرعملدرآمد کی تاکید ضروری ہے، وزیراعظم

اسلام آباد: وزیراعظم عمران خان کا کہنا ہے کہ ملک میں مساجد کو کسی صورت بند نہیں کیا جا سکتا تاہم انسداد کورونا ایس او پیز پرعملدرآمد کی تاکید ضروری ہے۔

وزیرِاعظم عمران خان سے وزیرِمذہبی امور پیرنورالحق قادری نے اسلام آباد میں ملاقات کی، جس میں کورونا وباء کی صورتحال پر تبادلہ خیال کیا گیا، وزیرِاعظم  نے وزارتِ مذہبی امور کو وباء کے حوالے سے علماء اور این سی او سی کے ساتھ مسلسل رابطے میں رہنے کی ہدایت کی۔

وزیراعظم ہاؤس کی جانب سے جاری بیان کے مطابق ملاقات میں وزیراعظم کا کہنا تھا کہ وزارتِ مذہبی امور علماء و مشائخ کو کورونا کے پھیلاؤ کے اعشاریوں کی فراہمی یقینی بنائے تاکہ دینی مواعظ اور خطبات میں کرونا ایس او پیز پر عملدرامد کی تاکید منبر کے ذریعے ممکن ہو۔

وزیراعظم عمران خان نے یہ بات بھی واضع کی کہ مساجد کو کسی صورت بند نہیں کیا جا سکتا تاہم انسداد کورونا ایس او پیز پرعملدرآمد کی تاکید ضروری ہے، پیرنورالحق قادری نے وزیرِاعظم سے علماء و مشائخ کونسل کی تنظیمِ نو پر بھی مشاورت کی۔