حکومت بجلی چوروں،نادہندگان کے خلاف بھرپور کارروائی کرے گی، وزیر اعظم

اسلام آباد:نگراں وزیراعظم انوار الحق کاکڑ نے کہا ہے کہ حکومت بجلی چوروں اور نادہندگان کے خلاف بھرپور کارروائی کرے گی اور انہیں کسی قسم کی رعایت نہیں دی جائے گی۔

نگراں وزیر اعظم کی زیر صدارت بجلی کے شعبے کے حوالے سے اجلاس ہوا، جس میں بجلی کی مجموعی پیداواری استعداد، ترسیل اور اسکے لئے استعمال ہونے والے انرجی مکس ، بجلی نظام کے نقصانات اور بجلی چوری کے اعشاریے پیش کئے گئے۔وزیراعظم نے اجلاس میں گفتگو کرتے ہوئے کہا کہ حکومت بجلی کے شعبے کا گردشی قرضہ کم کرنے کیلئے ہر ممکن اقدامات کرے گی۔ بجلی کی پیداوار کیلیے قابل تجدید اور ہائیڈل ذرائع کو ترجیح دی جائے، تقسیم کار کمپنیوں کے نقصانات میں کمی کیلئے مؤثر اقدامات کیے جائیں، ٹرانسفارمر میٹرنگ کے منصوبے کے اطلاق کیلئے جامع لائحہ عمل پیش کیا جائے۔ چھوٹے ہائیڈل منصوبوں کیلئے ماہرین کی رہنمائی میں منصوبے بنا کر پیش کئے جائیں کیونکہ ایسے مںصوبوں سے کم لاگت بجلی پیدا ہوسکتی ہے ۔

وزیراعظم نے کہا کہ کوئلے سے بجلی بنانے کے منصوبوں میں مہنگے درآمدی کوئلے کی بجائے مقامی کوئلے کو ترجیح دی جائے،2400 میگاواٹ کے شمسی توانائی کے منصوبوں کی تعمیر پرجلد سے جلد کام شروع کیا جائے اور اس پورے عمل میں شفافیت یقینی بنائی جائے۔اجلاس کو بتایا گیا کہ انرجی مارکیٹ کے قیام سے بجلی کے شعبے کی استعداد و کارکردگی میں مؤثر اضافہ ہوگا جس سے دو کروڑ ستر لاکھ گھریلو صارفین کو فائدہ پہنچے گا۔