دنیا بھارتی ظلم وجبرکیخلاف کارروائی،کشمیریوں کوحق وخودارادیت کا وعدہ پورا کرے، وزیراعظم

وزیراعظم عمران خان نے کہا ہے کہ پانچ جنوری کا دن اقوام متحدہ اور اسکے رکن ممالک کو اہلِ کشمیر سے کیے گئے ادھورے عہد کی یاددہانی کے طور پرمناتے ہیں، عالمی برادری قابض بھارتی افواج معصوم کشمیریوں کے انسانی حقوق کی پامالیوں کیخلاف کارروائی اور اہلِ کشمیر کو ان کے حقِ خودارادیت کی فراہمی یقینی بنائے۔

سماجی رابطوں کی ویب سائٹ پر جاری اپنے بیان میں وزیراعظم عمران خان نے کہا ہے کہ پانچ جنوری 1949 کو اقوام متحدہ نے جموں و کشمیر کے عوام کو ایک غیر جانبدارانہ استصوابِ رائے کے ذریعے حقِ خودارادیت کی ضمانت دی تھی۔ ہم اس دن کو اقوام متحدہ اور اس کے رکن ممالک کو اہلِ کشمیر سے کیے گئے اس ادھورےعہد کی یاددہانی کے طور پرمناتے ہیں جسے پورا کیا جانا ابھی باقی ہے۔

وزیراعظم عمران خان کا کہنا ہے کہ 73 برس تک ظالمانہ بھارتی تسلط کا جبر سہنےکے باوجود اہلِ کشمیر نسل در نسل اپنے حقِ خودارادیت، جس کی ضمانت انہیں اقوام متحدہ کے چارٹر اور سلامتی کونسل کی جانب سے دی گئی ہے، کے حصول کے مطالبے پر ڈٹ کر کھڑے ہیں۔

 انہوں نے کہا ہے کہ بھارت کے بے رحم، غیرانسانی اور غیرقانونی تسلط و جبر سے آزادی کی جدوجہد میں پاکستان اہل کشمیر کے ساتھ واضح طور پر کھڑا ہے۔ ہم عالمی برادری سے التماس کرتے ہیں کہ قابض بھارتی افواج کے ہاتھوں خواتین اور بچوں سمیت معصوم کشمیریوں کے انسانی حقوق کی پامالیوں کیخلاف کارروائی اور اہلِ کشمیر کو ان کے حقِ خودارادیت کی فراہمی یقینی بنائیں۔