انتخابات سے متعلق ہنگامی مشاورت۔۔ چیف الیکشن کمشنر 20 فروری کو ایوان صدر مدعو

صدر مملکت ڈاکٹر عارف علوی نے چیف الیکشن کمشنر سکندر سلطان راجہ کو الیکشنز کے حوالے سے مشاورت کے لیے دعوت بھجوائی ہے۔ صدر مملکت عام انتخابات کی تاریخ یا تاریخوں کا اعلان کمیشن سے مشاورت کے بعد کریں گے۔

صدرمملکت کی جانب سے بھجوائے گئے خط میں کہا گیا ہے کہ اس معاملے پر لاہور ہائی کورٹ کے فیصلے اور سپریم کورٹ کے حالیہ مشاہدات جیسی کچھ اہم پیش رفت ہوئی، لیکن الیکشن کمیشن کے روئیے پر افسوس ہوا۔
صدر مملکت کا کہنا ہے کہ الیکشن کمیشن نے انتخابات کے حوالے سے ابھی تک پہلے خط کا جواب نہیں دیا، میں بے چینی سے انتظار کر رہا تھا کہ کمیشن اپنے آئینی فرائض کا احساس کرے گا اور اس کے مطابق کام کرے گا۔ اہم معاملے پر الیکشن کمیشن کے افسوسناک رویے سے انتہائی مایوسی ہوئی ۔
انہوں نے اپنے خط میں لکھا ہے کہ آئین کے تحفظ اور دفاع کی اپنی آئینی ذمہ داری کا احساس کرتے ہوئے چیف الیکشن کمشنر کو 20 فروری کو اپنے دفتر میں الیکشن پر مشاورت کیلئے ہنگامی ملاقات کیلئے مدعو کرتا ہوں ۔