صدر مملکت نے 6 نومبر کو ملک میں عام انتخابات کی تاریخ دے دی

اسلام آباد:صدرمملکت نے  6 نومبر کو ملک میں  عام انتخابات کی  تاریخ  دے  دی ۔ صدر مملکت  ڈاکٹر  عارف علوی نے  آرٹیکل  48 (5 ) کے تحت   الیکشن کی  تاریخ دی ہے ۔ صدر مملکت نے   چیف الیکشن کمشنر کو  خط لکھ دیا۔

صدر مملکت نے کہا کہ 9اگست کو وزیراعظم کے مشورے پر قومی اسمبلی تحلیل کی، آرٹیکل 48 کی شق 5کے تحت صدر مملکت کو اختیار ہے کہ 90 روز کے اندر عام انتخابات کی تاریخ مقرر کرے۔قومی اسمبلی کے عام انتخابات تحلیل کی تاریخ کے نواسی ویں دن یعنی پیر 6 نومبر 2023 کو ہونے چاہئیں۔آئینی ذمہ داری پورا کرنے کی خاطر چیف الیکشن کمشنر کو ملاقات کے لیے مدعو کیا گیا ۔چیف الیکشن کمشنر نے جواب میں موقف اختیار کیا کہ آئین کی اسکیم اور فریم ورک کے مطابق یہ الیکشن کمیشن کا اختیار ہے، صدر مملکت نے کہاکہ اگست میں مردم شماری کی اشاعت کے بعد حلقہ بندیوں کا عمل جاری ہے جو آئین کے آرٹیکل 51(5) اور الیکشن ایکٹ کے سیکشن 17 کے تحت یہ ایک لازمی شرط ہے ۔وفاقی وزارت قانون و انصاف اور چاروں صوبائی حکومتوں کا خیال ہے کہ انتخابات کی تاریخ کا اعلان الیکشن کمیشن آف پاکستان کا مینڈیٹ ہے۔۔ صدر ممکت نے خط میں مزید کہا ہے کہ یہ الیکشن کمیشن کی ذمہ دار ی ہے کہ آزادانہ اور منصفانہ انتخابات کے انعقاد کے لیے آرٹیکل 51، 218، 219، 220 اور الیکشنز ایکٹ 2017 کے تحت طے شدہ تمام آئینی اور قانونی اقدامات کی پابندی کرے۔۔