مسلسل چوتھے ہفتے بھی مہنگائی میں اضافہ، چینی،آٹے کی قیمتیں پھربے قابو

  اسلام آباد:ملک میں مسلسل چوتھے ہفتے بھی مہنگائی میں اضافہ ریکارڈ کیا گیاہے۔ ایک ہفتے میں مہنگائی 0.81 فیصد بڑھ کر 9.17 فیصد ہوگئی ، چینی اور آٹے کی قیمتوں میں دوبارہ اضافےکا سلسلہ شروع ہوگیا۔

ادارہ شماریات کے مطابق ایک ہفتے میں 24 اشیائے ضروریہ مہنگی ہوئیں۔چینی کی قیمت میں 3 روپے 37 پیسے فی کلو اضافہ ہوا جبکہ آٹے کا 20 کلو کا تھیلا 23 روپے 88 پیسے مہنگاہوا۔چینی اس وقت 93 روپے 59 پیسے جبکہ آٹے 20 کلو کا تھیلا 970 روپے میں فروخت ہو رہاہے ۔حالیہ ہفتےمر غی 11 روپے 47 پیسے فی کلو،انڈے 6 روپے 80 پیسے درجن جبکہ گھی کا اڑھائی کلو کا ڈبہ 9 روپے 75 پیسے مہنگا ہوا۔دال چنا ،دال ماش،دال مونگ، مسور اور چاول بھی مہنگے ہوئے۔

ہفتہ وار اعداد و شمار کے مطابق رواں ہفتے ٹماٹر 7 روپے 50 پیسے فی کلو اورایل پی جی کا گھریلو سلنڈر 34 روپے 20 پیسے سستا ہوا ، 21 اشیاء کی قیمتوں میں استحکام رہا ۔