پی ٹی آئی کورکمیٹی کااجلاس، وزیراعظم کی بلدیاتی انتخابات کی تیاری کی ہدایت

اسلام آباد: وزیراعظم عمران خان نے کہا کہ بلدیاتی انتخابات میں پارٹی ٹکٹس میرٹ پر دئیے جائیں گے،پارٹی رہنما آج سے ہی بلدیاتی انتخابات کی تیاریوں کا آغاز کرتے ہوئے عوامی رابطہ مہم شروع کر دیں۔کالعدم تنظیم کے ا حتجاج کے بعد معاملات کو خوش اسلوبی سے حل کرنے کے لیے مذاکرات ہی واحد حل تھے۔ کور کمیٹی نے الیکشن کمیشن کی جانب سے فواد چوہدری اور اعظم سواتی کو شوز کاز نوٹس جاری کرنے پر بھی تشویش کا اظہارکیا۔

وزیراعظم عمران خان کی زیر صدارت تحریک انصاف کی کورکمیٹی کا اجلاس ہوا جس میں وفاقی وزراء اور پارٹی رہنماوں کی شرکت کی ۔ اجلاس میں پارٹی امور اور بلدیاتی انتخابات کے حوالے سے مشاورت کی گئی جبکہ کالعدم ٹی ایل پی کے ساتھ معاہدے پر بھی کمیٹی کو اعتماد میں لیاگیا۔کمیٹی نے الیکشن کمیشن کی جانب سے فواد چوہدری اور اعظم سواتی کو شوز کاز نوٹس جاری کرنے پر تشویش کا اظہارکیا گیا۔

کور کمیٹی سے خطاب کرتے ہوئے وزیراعظم نے کہا کہ بلدیاتی انتخابات میں پارٹی ٹکٹس میرٹ پر دئیے جائیں گے،پارٹی رہنما آج سے ہی بلدیاتی انتخابات کی تیاریوں کا آغاز کرتے ہوئے عوامی رابطہ مہم شروع کر دیں۔ کالعدم تنظیم کیساتھ معاہدے کے حوالے سے وزیر اعظم نے کہاکہ ملک میں فساد اور انتشار نہیں چاہتا، مسائل کو ہمیشہ بات چیت اور مذاکرات سے حل کرنے کی کوشش کی اورکبھی بھی طاقت کے استعمال کا حامی نہیں رہا ۔وزیر اعظم نے کہاکہ بد امنی کا کسی کو فائدہ نہیں ہو گا،حالیہ صورتحال کو خوش اسلوبی سے حل کرنے کے لیے مذاکرات ہی واحد حل تھے۔ وزیراعظم نے کورکمیٹی کو عوام کیلئے ریلیف پیکج پر بھی اعتماد میں لیا۔

اجلاس کے بعد میڈیا سے گفتگو میں وزیر اطلاعات فواد چوہدی اور معاون خصوصی شہباز گل نے کہاکہ الیکشن کمیشن نوٹسز واپس لے ۔ فواد چودھری نے کہا، شوکاز نوٹس زیادتی پر مبنی ہے، الیکشن کمیشن کو نوٹس واپس لینا چاہیے، شہباز گل کا کہناتھاکہ وزیراعظم سمیت کور کمیٹی نے نوٹس پر تشویش کا اظہار کیا، بات کرنے کی آزادی نہ دینا جمہوری روئیے نہیں، حکومت ملک میں شفاف انتخابات کا انعقاد چاہتی ہے تاکہ کوئی انگلی نہ اٹھا سکے ۔