تحریک انصاف کے 11 ار اکین اسمبلی کے استعفوں کی منظوری،ڈی نوٹیفائی کرنے کے نوٹیفکیشن معطل

 اسلام آباد ہائیکورٹ نے تحریک انصاف کے گیارہ ار اکین اسمبلی کے استعفوں کی منظوری اورڈی نوٹیفائی کرنے کے  نوٹیفکیشن معطل کر د ئیے ۔ پی ٹی آئی کے رکن قومی اسمبلی عبد الشکور شاد کی درخواست کے تحریری حکم نامے میں کہاگیاہے کہ28 اور 29 جولائی کو استعفوں کی منظوری اور ارکان اسمبلی کو ڈی نوٹیفائی کرنے کے لیے جاری دونوں نوٹی فکیشنز آئندہ سماعت تک معطل رہیں گے۔

اسلام آباد ہائی کورٹ کے چیف جسٹس اطہر من اللہ نے پی ٹی آئی کے رکن قومی اسمبلی عبد الشکور شاد کی درخواست پر سماعت کا تحریری حکم نامہ جاری کر دیا ہے۔ عدالت نے دونوں نوٹیفکیشن معطل کرتے ہوئے الیکشن کمیشن سمیت فریقین کو نوٹس جاری کرتے ہوئے 27 ستمبر تک جواب طلب کرلیا۔

تحریری حکم نامے میں کہا گیا ہے کہ درخواست کے وکیل کے مطابق ان کے موکل کا مستعفی ہونے کا کبھی ارادہ نہیں تھا۔ پی ٹی آئی کی جانب سے حاصل کیا گیا استعفی اصل نہیں تھا اور نہ ہی پٹیشنر اپنے استعفی کی تصدیق کے لیے اسپیکر قومی اسمبلی کے سامنے پیش ہوا۔ عدالت نے کہا کہ 28 اور 29 جولائی کو استعفوں کی منظوری اور ارکان اسمبلی کو ڈی نوٹیفائی کرنے کے لیے جاری دونوں نوٹی فکیشنز آئندہ سماعت تک معطل رہیں گے۔

 واضح رہے کہ اسپیکر اسمبلی نے پی ٹی آئی کے رکن اسمبلی علی محمد خان ، فضل محمد خان ، شوکت علی ، فخر زمان خان، اعجاز احمد شاہ ، جمیل احمد خان ، محمد اکرم چیمہ ، عبدالشکور شاد، فرخ حبیب ، شیریں مزاری اور شاندانہ گلزار کے استعفوں کی منظوری دی تھی ۔ اس کے بعد الیکشن کمیشن نے انہیں ایک ساتھ ڈی نوٹیفائی کرنے کا نوٹی فکیشن جاری کیا تھا ۔۔۔