سیکیورٹی فورسز کا پنجگور،نوشکی میں کلئیرنس آپریشن مکمل، 20دہشتگرد ہلاک

 راولپنڈی : سیکیورٹی فورسز نے پنجگوراور نوشکی میں کلئیر نس آپریشن مکمل کرلیا۔ آئی ایس پی آر کے مطابق آپریشنز میں انتہائی مطلوب دہشتگردوں سمیت 20دہشتگرد ہلاک کیے گئے ۔ دہشتگردوں سے لڑتے ہوئے ایک آفیسر اور جے سی او سمیت 9 سکیورٹی اہلکار وں نے جام شہادت نوش کیا۔

آئی ایس پی آر کے مطابق دہشت گردوں نے 2 فروری کی رات نوشکی اور پنجگور میں سیکیورٹی فورسز کے کیمپوں پرحملے کئے تھے، سیکیورٹی فورسز نے بھرپور جوابی کارروائی کے دوران دونوں مقامات پر دہشت گردوں کے حملے ناکام بنائے، نوشکی میں آپریشنز کے دوران 9 دہشت گرد مارے گئے جبکہ دہشتگردوں کاحملہ پسپا کرتے ہوئے ایک افسر سمیت 4 سیکیورٹی اہلکار شہید ہوئے۔پنجگور میں سیکیورٹی فورسز نے بھرپور مقابلہ کرتے ہوئے دہشت گردوں کا حملہ ناکام بنایا جبکہ کلیئرنس آپریشن بھاگنے والے 4 دہشتگردوں کو گھیرے میں لیکر ہلاک کیا۔ پنجگور آپریشن کےدوران ایک جےسی او سمیت 5 جوان شہید جبکہ 6 زخمی ہوئے،پنجگور میں فالو اپ آپریشن 72 گھنٹےجاری رہا، پنجگور حملوں سے متعلقہ 4 دہشتگرد آج جبکہ 3گزشتہ روز مارے گئے تھے، ان میں دوانتہائی مطلوب دہشت گرد شامل تھے۔

دوسری جانب سکیورٹی فورسز کے جنوبی وزیرستان میں خفیہ معلومات پر دو آپریشنز کیے ۔ سرواکئی میں آپریشن کے دوران کالعدم ٹی ٹی پی کا دہشت گرد اللہ نور برقعہ پہن کر فرار کی کوشش میں گرفتار کیا گیا جبکہ ہتھیار، گولیاں، گرینیڈز اور آلات مواصلات برآمدکیے گئے ۔جنوبی وزیرستان کے علاقے مکین میں آپریشن کے دوران ایم 16 رائفلز اور دیگر اسلحہ برآمدکیا گیا۔ اسلحہ درہ آدم خیل منتقل کرنے والے 4 افراد بھی گرفتار کر لئے گئے۔ سیکیورٹی فورسز نے اس عزم کا اظہار کیا ہے کہ ملک کے چپے چپے سے دہشت گردی کے مکمل خاتمے تک ان کی جنگ جاری رہے گی ۔

Comments are closed.