پی ٹی آئی مقبول ترین جماعت،بلدیاتی انتخابات میں پوری قوت کے ساتھ اتریں گے،وزیراعظم

  اسلام آباد: وزیراعظم عمران خان نے کہا ہےکہ بلدیاتی انتخابات میں پوری قوت کے ساتھ میدان میں اتریں گے،بلدیاتی انتخابات کے لیے پارٹی کا تنظیمی ڈھانچہ منظم کیا جائے اور ٹکٹ میرٹ پرتقسیم کیے جائیں۔

وزیراعظم عمران خان کی زیر صدارت تحریک انصاف کی سینٹرل ایگزیکٹیو کمیٹی کا اجلاس ہوا جس میں بلدیاتی انتخابات کے لیے عوامی رابطہ مہم شروع کرنے کا فیصلہ کیاگیا۔وزیراعظم نے پارٹی رہنماوں کو ہدایت کی کہ بڑے عوامی جلسوں کا شیڈول تیار کیاجائے ۔اجلاس میں بلدیاتی انتخابات کی تیاریوں کا جائزہ لیا گیا اور ٹکٹوں کی تقسیم کے طریقہ کار پر بھی مشاورت کی گئی۔بڑے شہروں میں مئیرز کے لیے ناموں پر بھی غور کیا گیا۔ اس موقع پر وزیراعظم نے کہا کہ بلدیاتی انتخابات میں پوری قوت کے ساتھ میدان میں اتریں گے،تحریک انصاف ملک کی مقبول ترین جماعت ہے۔عوام کے پاس پی ٹی آئی کے علاوہ کوئی بہتر آپشن نہیں ، عوامی رابطہ مہم کے لیےجلسوں کا شیڈول تیار کیاجائے ۔

وزیر اعظم نے ہدایت کی کہ بلدیاتی انتخابات کے لیے پارٹی کے تنظیمی ڈھانچے کو منظم کیا جائے اور ٹکٹ میرٹ پر تقسیم کیے جائیں، کارکنان پارٹی کا قیمتی اثاثہ ہیں۔اجلاس میں دورہ چین سے متعلق بھی بریفنگ دی گئی ۔وزیراعظم نے دورہ چین کی کامیابی کو اجاگر کرنے کی بھی ہدایت کی۔