سینیٹ میں جوابی قرارداد، سپریم کورٹ  میں توہین عدالت کی کارروائی کے لیے درخواست دائر

 اسلام آباد : انتخابات  ملتوی کروانے کے لیے سینیٹ میں قرارداد پاس ہونے پر چیئرمین سینیٹ اور ارکان کے خلاف توہین عدالت کی کارروائی کے لیے درخواست دائر کردی گئی ۔   سینیٹر مشتاق احمد نے سینیٹ میں جوابی قرارداد  بھی جمع کرادی۔

درخواست گزار وکیل اشتیاق احمد نے کہا ہے کہ سینیٹ میں پاس قرارداد توہین عدالت کے زمرے میں آتی ہے۔چیئرمین سینیٹ اور ارکان کے خلاف توہین عدالت کی کارروائی کی جائے۔ قرار داد میں  کہا گیا ہے کہ چور دروزے سے  پاس قرارداد جمہوریت اور الیکشن پر حملہ ہے۔سینیٹ کی بے توقیری کی گئی ہے۔

سینیٹر مشتاق احمد نے کہا کہ یہ قرار داد ماورائے دستور ہے۔ سینیٹ آف پاکستان سے ایسی قرار داد پاس نہیں کی جا سکتی جو دستور کے خلاف ہو۔ الیکشن کا انعقاد ایک دستوری تقاضا ہے جو نگران حکومت اور الیکشن کمیشن کی ذمہ داری ہے ۔

 اس حوالے سے سپریم کورٹ آف پاکستان کا فیصلہ آچکا ہے لیکن نگران حکومت، غیر جمہوری قوتیں الیکشن سے بھاگ رہی  ہے ۔ الیکشن التواء کے ملکی سیاست، جمہوریت اور سالمیت پر خطرناک اثرات مرتب ہوں گے۔

 واضح رہے کہ گزشتہ روز انتخابات ملتوی کروانے کے لیے سینیٹ میں قرار داد پیش کی گئی جسے منظور کرلیا گیا  تھا۔