ملک میں فی الفورشفاف انتخابات کروائے جائیں، شہباز شریف،مولانا فضل الرحمان

اسلام آباد: قومی اسمبلی میں اپوزیشن لیڈر شہباز شریف اور جے یو آئی کے سربراہ فضل الرحمان نے ملک میں فوری الیکشن کا مطالبہ کردیا۔جمعیت علماء اسلام کے سربراہ مولانا فضل الرحمان نے صدر پاکستان مسلم لیگ نون شہباز شریف کے گھر پر ان سے ملاقات کی، جس میں ملکی سیاسی صورتحال، اپوزیشن اتحاد ، مہنگائی اور بجلی و گیس کی قیمتوں میں اضافے پر گفتگو ہوئی۔

 ملاقات کے بعد میڈیا سے گفتگو میں شہباز شریف نے کہا کہ آٹے و چینی کی قیمتیں آسمان سے باتیں کر رہی ہیں، لیکن حکومت غفلت کی نیند سو رہی ہے، پی ڈی ایم سمیت تمام سیاسی جماعتوں کا مطالبہ ہے ملک میں فی الفور شفاف انتخابات کروائے جائیں، ملک کو ترقی کی منزل کی طرف لے جانے کا یہی ایک راستہ ہے،میں اور مولانا متفق ہیں، حکومت اور مہنگائی کے خلاف مارچ ہرصورت کرنا ہوگا، شہباز شریف نے کہاکہ نریندرمودی فوج کے وقار کو وہ نقصان نہیں پہنچا سکا، جو عمران خان نے نازک معاملات کو ہینڈل کرکے پہنچایا، یہ انتہائی قابل افسوس ہے۔

چند روزسے یونٹی آف کمانڈ کے حوالے سے خبریں ساری قوم دیکھ رہی ہے، مولانا فضل الرحمان

مولانا فضل الرحمان نے کہا کہ پی ڈی ایم اپنے اہداف کے حصول کے لئے متحرک ہے، 16 اکتوبر کو فیصل آباد میں پی ڈی ایم کا تاریخی اجتماع ہوگا، ہر شخص اس حکومت سے جان چھڑانا چاہتا ہے، ملک میں فوری انتخابات ضروری ہیں، سرکاری ملازمین کی برطرفیوں کے خلاف ہم ان کے ساتھ کھڑے ہیں، ہر طبقہ اس وقت مشکل حالات میں ہے، غریب آدمی آج اشیائے ضروریہ خریدنے کی پوزیشن میں نہیں رہا۔

سربراہ جے یو آئی نے مزید کہا کہ تمام ادارے تباہ ہوگئے ہیں، ہم پورے ملک، اداروں اور عوام کو رو رہے ہیں، فوج جسے ہم طاقتور دیکھنا چاہتے ہیں لیکن گزشتہ چند روز سے یو نٹی آف کمانڈ کے حوالے سے جو خبریں چل رہی ہیں وہ ساری قوم دیکھ رہی ہے، مودی ہماری فوج کو اتنا نقصان نہیں پہنچا سکا جتنا عمران خان نے ہنچایا ہے، یونٹی آف کمانڈ کے ادارے کا کیا حشر کردیا گیا ہے، ہم اس ادارے کو ملکی دفاع کے لیے منظم اور طاقتور دیکھنا چاہتے ہیں، اس صورتحال میں مل کر ہم نے آگے بڑھنا ہے۔