سری لنکا نے افغانستان کو شکست دے کر سپر فور میں جگہ بنا لی

ابوظہبی: ٹی 20 ایشیا کپ 2025 کے گروپ بی کے اہم میچ میں سری لنکا نے افغانستان کو 6 وکٹوں سے شکست دے کر ایونٹ کے سپر فور مرحلے میں کوالیفائی کرلیا۔ افغانستان کی ٹیم اس شکست کے ساتھ ہی ٹورنامنٹ سے باہر ہوگئی۔

میچ کی تفصیل

ابوظہبی کے زید کرکٹ اسٹیڈیم میں کھیلے گئے 11 ویں میچ میں افغانستان کے کپتان راشد خان نے ٹاس جیت کر پہلے بیٹنگ کا فیصلہ کیا۔ افغان ٹیم نے مقررہ 20 اوورز میں 8 وکٹوں کے نقصان پر 169 رنز بنائے۔ محمد نبی شاندار کھیل کا مظاہرہ کرتے ہوئے 60 رنز کے ساتھ نمایاں بلے باز رہے۔ دیگر کھلاڑیوں میں ابراہیم زادران اور راشد خان نے 24، 24 رنز کی اننگز کھیلی جبکہ صدیق اللہ نے 18 اور رحمان اللہ گرباز نے 14 رنز بنائے۔

سری لنکا کی اننگز

170 رنز کے تعاقب میں سری لنکا نے جارحانہ انداز اپنایا اور 18.4 اوورز میں 4 وکٹوں کے نقصان پر ہدف حاصل کرلیا۔ اوپنر کوشال مینڈس نے شاندار بلے بازی کرتے ہوئے ناقابل شکست 74 رنز بنائے اور اپنی ٹیم کی کامیابی میں مرکزی کردار ادا کیا۔ کامیندو مینڈس نے 26 جبکہ کوشال پریرا نے 28 رنز کی مفید اننگز کھیلی۔

پوائنٹس ٹیبل کی صورتحال

گروپ بی میں مسلسل تین فتوحات کے بعد سری لنکا 6 پوائنٹس کے ساتھ پہلی پوزیشن پر براجمان ہے۔ بنگلادیش 4 پوائنٹس کے ساتھ دوسرے نمبر پر رہا اور دونوں ٹیموں نے سپر فور کے لیے کوالیفائی کرلیا ہے۔ دوسری جانب افغانستان کا ایشیا کپ 2025 کا سفر اس شکست کے ساتھ ہی اختتام پذیر ہوگیا۔