شوکت عزیز صدیقی کی برطرفی کیخلاف اپیل سپریم کورٹ میں سماعت کیلئے مقرر

سپریم کورٹ آف پاکستان نے اسلام آباد ہائیکورٹ کے برطرف جج شوکت عزیز صدیقی کی برطرفی کے خلاف اپیل سماعت کے لئے مقرر کر دی۔

چیف جسٹس آف پاکستان جسٹس گلزار احمد نے شوکت عزیز صدیقی کی برطرفی کیخلاف اپیل سماعت کیلئے مقرر کر دی ہے۔ اسلام آباد اور کراچی بار ایسوسی ایشنز کی اپیلیں بھی سماعت کیلئے مقرر کر دی گئیں،جسٹس عمر عطا بندیال کی سربراہی میں پانچ رکنی لارجر بینچ 17 مئی کو سماعت کرے گا، بینچ میں جسٹس سردار طارق اور جسٹس اعجاز الاحسن، جسٹس مظہر عالم میاں خیل اور جسٹس سجاد علی شاہ بھی بینچ کا حصہ ہونگے۔

سپریم کورٹ آف پاکستان نے اٹارنی جنرل فار پاکستان سمیت دیگر فریقین کو نوٹس جاری کر دیئے ہیں، عدالت نے اٹارنی جنرل سمیت دیگر فریقین کو نوٹس جاری کر دیا، شوکت عزیز صدیقی نے اپنی برطرفی کے سپریم جوڈیشل کونسل کے فیصلے کیخلاف عدالت عظمیٰ میں اپیل دائر کر رکھی ہے۔

واضح رہے کہ شوکت عزیز صدیقی کو راولپنڈی بار کی جانب سے منعقدہ ایک تقریب میں قومی سلامتی کے اداروں پر تنقید اور متنازعہ تقریر کے بعد اسلام آباد ہائی کورٹ کے جج کے عہدے سے برطرف کر دیا گیا تھا۔