آزادکشمیر کے رہائشی درندہ صفت چچا نے 6 ماہ کی بھتیجی کوذبح کردیا

بھمبر:آزاد کشمیر کے ضلع بھمبر میں درندہ صفت چچا نے اپنی چھ ماہ کی بھتیجی کو ذبح کردیا جبکہ پوتی کو بچاتے ہوئے دادی بھی زخمی ہوگئی

نیوز ڈپلومیسی کے مطابق درنگی اور سفاکیت کا یہ واقعہ بھمبر کے نواحی علاقے موڑہ سدھا میں پیش آیا جہاں جنونی نوجوان 24سالہ عبدالجلیل نے اپنی 6 ماہ کی حقیقی بھتیجی کو ذبح جبکہ اپنی ماں کو زخمی کر ڈالا۔ ڈسٹرکٹ ہیڈ کوارٹر اسپتال بھمبر میں زخمی خاتون کو فوری طبی امداد دی گئی جبکہ بچی کی نعش ضروری کارروائی کے بعد ورثاء کے حوالے کردی گئی ۔

ملزم نے اپنی بھتیجی زمل فاطمہ دختر محمد قاسم کو چھری کے ساتھ پہلے بےدردی سے ذبح کیا اور اس کے بعد اس کے سینے پر بھی کئی وار کیے۔ ملزم نے بچی کو بچانے کی کوشش کرنے والی اپنی ماں کو بھی زخمی کر دیا۔ذرائع کا کہنا ہے کہ ملزم کا ذہنی توازن ٹھیک نہیں، بچی کی والدہ اور والد غم سے نڈھال ہیں ۔پولیس نے  ملزم عبدالجلیل کو گھر کے قریب واقع مسجد سے گرفتار کر لیا ہے۔