ویسٹ انڈیز کا پاکستان کو 34 سال بعد تاریخی وائٹ واش، تیسرے ون ڈے میں 202 رنز سے عبرتناک شکست

ویسٹ انڈیز نے پاکستان کو 34 سال بعد ایک روزہ سیریز میں شکست دے کر تاریخ رقم کر دی۔ ٹرینیڈاڈ کے برائن لارا کرکٹ اسٹیڈیم میں کھیلے گئے تیسرے اور فیصلہ کن ون ڈے میں میزبان ٹیم نے 202 رنز سے کامیابی حاصل کی اور سیریز 1-2 سے اپنے نام کر لی۔

ویسٹ انڈیز کی شاندار بیٹنگ پرفارمنس
پاکستانی کپتان محمد رضوان نے ٹاس جیت کر میزبان کپتان شائے ہوپ کو بیٹنگ کی دعوت دی۔ ویسٹ انڈیز نے مقررہ 50 اوورز میں 6 وکٹوں پر 294 رنز بنائے۔ شائے ہوپ نے شاندار بیٹنگ کرتے ہوئے 94 گیندوں پر 120 رنز کی ناقابل شکست اننگز کھیلی، جبکہ جسٹن گریوز نے صرف 24 گیندوں پر دھواں دھار 43 رنز بنائے۔ پاکستان کی جانب سے نسیم شاہ اور ابرار احمد نے 2،2 وکٹیں حاصل کیں، محمد نواز اور صائم ایوب نے ایک ایک کھلاڑی کو آؤٹ کیا۔

پاکستانی بیٹنگ لائن کی بدترین ناکامی
295 رنز کے ہدف کے تعاقب میں پاکستان کی بیٹنگ لائن ریت کی دیوار ثابت ہوئی۔ پوری ٹیم صرف 92 رنز پر ڈھیر ہوگئی۔ اوپنرز صائم ایوب، عبداللہ شفیق اور کپتان محمد رضوان بغیر کوئی رن بنائے پویلین لوٹ گئے۔ بابر اعظم صرف 9 رنز ہی بنا سکے۔ سلمان علی آغا 30 اور محمد نواز 23 رنز بنا کر نمایاں رہے، جبکہ حسن نواز نے 13 رنز بنائے۔

ویسٹ انڈیز کے باؤلرز کا شاندار کھیل
میزبان ٹیم کے جیڈن سلز نے شاندار باؤلنگ کرتے ہوئے 6 کھلاڑیوں کو آؤٹ کیا، گداکیش موتی نے 2 اور روسٹن چیز نے 1 وکٹ حاصل کی۔ شائے ہوپ کو میچ کا بہترین کھلاڑی اور جیڈن سلز کو سیریز کا بہترین کھلاڑی قرار دیا گیا۔