عمران خان کے بیٹے قاسم اور سلیمان احتجاج کے لیے پاکستان نہیں آئیں گے، سابق وزیراعظم کا دو ٹوک اعلان

راولپنڈی: پاکستان تحریک انصاف (پی ٹی آئی) کے بانی اور سابق وزیراعظم عمران خان نے واضح کر دیا ہے کہ ان کے بیٹے قاسم اور سلیمان 5 اگست کو ہونے والے کسی بھی احتجاج میں شرکت کے لیے پاکستان نہیں آئیں گے۔

اڈیالہ جیل میں جاری مقدمے کی سماعت کے دوران جب عدالت میں موجود افراد کی جانب سے عمران خان سے سوال کیا گیا کہ آیا ان کے بیٹے احتجاج میں شرکت کے لیے وطن واپس آ رہے ہیں، تو انہوں نے مختصر اور دو ٹوک جواب دیا:

> “نہیں، وہ احتجاج کے لیے پاکستان نہیں آئیں گے۔”

عمران خان کا یہ بیان ان تمام افواہوں کی تردید ہے جو حالیہ دنوں سوشل میڈیا اور مختلف ذرائع سے پھیلائی جا رہی تھیں کہ ان کے بیٹے والد کی رہائی کے لیے ہونے والے احتجاج کی قیادت کریں گے۔

اس سے قبل پی ٹی آئی کی مقامی قیادت اور عمران خان کی بہن علیمہ خان کی جانب سے دعویٰ کیا گیا تھا کہ قاسم اور سلیمان والد سے اظہارِ یکجہتی کے لیے پاکستان آئیں گے۔ تاہم اب خود عمران خان کے واضح مؤقف کے بعد ان تمام قیاس آرائیوں کا خاتمہ ہو گیا ہے۔

ذرائع کے مطابق، اگر قاسم یا سلیمان صرف اپنے والد سے ملاقات کے لیے پاکستان آنا چاہیں، تو یہ عدالت کی اجازت سے ممکن ہو سکتا ہے، مگر احتجاج میں شرکت کی کوئی منصوبہ بندی نہیں کی گئی۔