اسرائیلی فضائی حملہ: یمن کے وزیراعظم اور 11 وزرا جاں بحق

یمن کے دارالحکومت صنعا میں اسرائیلی فضائی حملے کے نتیجے میں یمن کی حوثی حکومت کے وزیراعظم احمد غالب الرحاوی اور کابینہ کے 11 وزرا جاں بحق ہوگئے۔ تاس نیوز ایجنسی نے یمنی خبررساں ادارے “صبا” کے حوالے سے اس افسوسناک خبر کی تصدیق کی ہے۔ یہ حملہ 28 اگست کو اس وقت کیا گیا جب حوثی رہنما عبدالمالک الحوثی ٹیلی ویژن پر خطاب کر رہے تھے۔

شہید وزرا کی فہرست

اس فضائی حملے میں جاں بحق ہونے والے وزرا میں وزیر انصاف مجاہد احمد، وزیر اقتصادیات معین المہاکری، وزیر زراعت رضوان الرباعی، وزیر خارجہ جمال عامر، وزیر توانائی علی حسن، وزیر ثقافت علی ال یافعی، وزیر محنت سمیر بجالہ، وزیر اطلاعات ہاشم شرف الدین اور وزیر کھیل محمد المولد شامل ہیں۔

دیگر حکومتی عہدیدار بھی نشانہ

اس حملے میں دو اعلیٰ سرکاری عہدیدار محمد الکاسبی اور حکومتی سیکرٹری زاہد العمدی بھی ہلاک ہوئے۔ اس سے قبل حوثی حکام نے ہفتے کے روز وزیراعظم احمد غالب الرحاوی کی ہلاکت کی تصدیق کر دی تھی اور اعلان کیا تھا کہ ان کی جگہ ان کے نائب محمد مفتاح نے وزارتِ عظمیٰ کا منصب سنبھال لیا ہے۔

اسرائیلی فوج کا موقف

اسرائیلی فوج کے مطابق حملے میں حوثیوں کی ایک فوجی تنصیب کو نشانہ بنایا گیا۔ اسرائیل کے ٹی وی چینل N12 نے دعویٰ کیا کہ اس حملے میں وزیر دفاع اور جنرل اسٹاف چیف سمیت انصار اللہ تحریک کے اعلیٰ کمانڈر بھی نشانہ بنے۔ رپورٹ کے مطابق اسرائیلی لڑاکا طیاروں نے ہدف پر کم از کم 10 حملے کیے، جہاں حوثی قیادت اپنے رہنما کا خطاب دیکھنے کے لیے جمع تھی۔

علاقائی صورتحال پر اثرات

یہ حملہ یمن میں جاری تنازع اور مشرق وسطیٰ میں کشیدگی کو مزید بڑھا سکتا ہے۔ حوثی گروپ نے عزم ظاہر کیا ہے کہ وہ اس حملے کا جواب دیں گے، جبکہ خطے میں پہلے ہی اسرائیل اور مختلف مزاحمتی گروہوں کے درمیان کشیدگی شدت اختیار کر رہی ہے۔