فرضی انسانی حقوق کی خلاف ورزی کے پیچھے چھپنے کی تمام کوششیں بے سود ہیں، آرمی چیف

 راولپنڈی :آرمی چیف جنرل سید عاصم منیر نے کہا ہے کہ ملک میں بگاڑ پیدا کرنے اور فرضی انسانی حقوق کی خلاف ورزی کے پیچھے چھپنے کی تمام تر کوششیں بے سود ہیں، ناقابلِ تردید شواہد کوجھٹلایا اور نہ ہی بگاڑا جا سکتا ہے۔ فارمیشن کمانڈرز نے کہاکہ آئین پاکستان کے تحت شہداء کی یادگاروں ، جناح ہاؤس کی بے حرمتی اور فوجی تنصیبات پر حملہ کرنے والوں کو کیفر کردار تک پہنچایاجائے۔۔

آرمی چیف جنرل سید عاصم منیر کی زِیر صدارت فارمیشن کمانڈرز کانفرنس ہوئی جس میں کور کمانڈرز، پرنسپل اسٹاف آفیسر اور پاک فوج کے تمام فارمیشن کمانڈرز نے شرکت کی ۔ شرکاء نے سانحہ 9 مئی کے واقعات کی سخت ترین مذمت کی اور شہداء کی یادگاروں ، جناح ہاؤس کی بے حرمتی اور فوجی تنصیبات پر حملہ کرنے والوں کو آئین پاکستان کے تحت آرمی ایکٹ اور آفیشل سیکریٹ ایکٹ کے ذریعے کیفر کردار تک پہنچانے کا فیصلہ کیاگیاہے۔

فارمیشن کمانڈرز کانفرنس کے شرکا نے کہاکہ وقت آ گیا ہے کہ سانحہ 9 مئی کے منصوبہ سازوں اور ماسٹر مائنڈز کے خلاف قانون کی گرفت مضبوط کی جائے۔ مذموم مقاصد کے حصول کے لیے ریاست اور ریاستی اداروں کے خلاف نفرت پروان چڑھانے اور ملک میں افراتفری پھیلانے والوں کے خلاف گھیرا تنگ کیاجائے ۔ شرکاء نے اس عزم کا ا ظہا رکیاکہ مخالف قوتوں کے ناپاک عزائم کو مکمل طور پر ناکام بنانے کی راہ میں کسی بھی جانب سے رکاوٹیں کھڑی کرنے اور ابہام پیدا کرنے کی کوششوں سے آہنی ہاتھوں سے نمٹا جائےگا ، افواجِ پاکستان، ملک کی سلامتی اور استحکام کے لئے کسی بھی قربانی سے دریغ نہیں کریں گے۔

اس موقع پر آرمی چیف جنرل سید عاصم منیر نے کہا کہ رِیاست پاکستان اور مسلح اَفواج، شہداء پاکستان اور اِن کے اہلخانہ کو احترام کی نگاہ سے دیکھتی ہیں اور ان کی لازوال قربانیوں کو ہمیشہ سراہتی رہے گی ۔ملک میں بگاڑ پیدا کرنے اور فرضی انسانی حقوق کی خلاف ورزی کے پیچھے چھپنے کی تمام تر کوششیں بے سود ہیں، ناقابلِ تردید شواہد کوجھٹلایا اور نہ ہی بگاڑا جا سکتا ہے۔ پاکستان کی عوام اور مسلح افواج کا آپس میں گہرا تعلق ہے جو قومی سلامتی میں مرکزی حیثیت رکھتا ہے۔25 مئی کی تقریبات میں عوام کی بھرپور شرکت افواج پاکستان اور عوام میں گہر ے تعلق کی واضح عکاسی کرتی ہیں۔

 آرمی چیف کاکہناتھا کہ قانون نافذ کرنے والے اداروں اور سیکورٹی فورسز پر پرُ تشدد حملے، انسانی حقوق کی خلاف ورزیوں اور سیاسی سرگرمیوں کو روکنے کے بے بنیاد الزامات کا مقصد عوام کو گمراہ کرنا اور مسلح افواج کو بدنام کرکے مذموم سیاسی مفادات کا حصول ہے۔ملک دشمن عناصر اور ان کے حامی، جعلی اور بے بنیاد خبروں اور پروپیگنڈہ کے ذریعے معاشرتی تفرقہ اور انتشار پیدا کرنے کی بھرپور کوشش کر رہے ہیں۔ انشاء اللہ قوم کے بھرپپور تعاون سے تمام تر ناپاک عزائم کو ناکام بنایا جائے گا۔ فارمیشن کمانڈرز کانفرنس کے شرکاء نے مسلح اَفواج، قانون نافذ کرنے والے اِداروں اور ور سِول سوسائٹی کے شہداء کو زبردست زبردست خراجِ بھی عقیدت پیش کیا۔۔۔