امریکی صدر ڈونلڈ ٹرمپ نے انسانیت کی خدمت کی :محسن نقوی

وفاقی وزیر داخلہ محسن نقوی سے امریکا کی قائم مقام سفیر نیٹلی بیکر نے اسلام آباد میں اہم ملاقات کی۔ ملاقات میں پاک – امریکا تعلقات، انسداد دہشت گردی اور انسداد منشیات کے حوالے سے تعاون پر تفصیلی تبادلہ خیال کیا گیا۔ اس موقع پر قائم مقام امریکی سفیر نے محسن نقوی کو نشانِ امتیاز ملنے پر مبارکباد دی اور نیک خواہشات کا اظہار بھی کیا۔

بارشوں اور سیلاب سے نقصانات پر امریکی سفیر کا اظہار افسوس

نیٹلی بیکر نے خیبرپختونخوا سمیت پاکستان میں حالیہ بارشوں اور سیلابی ریلوں کے باعث جانی و مالی نقصانات پر گہرے دکھ اور افسوس کا اظہار کیا۔ انہوں نے کہا کہ ہماری تمام تر ہمدردیاں جاں بحق افراد کے خاندانوں کے ساتھ ہیں۔

محسن نقوی کا امریکی صدر کی امن کوششوں کو خراجِ تحسین

وفاقی وزیر داخلہ محسن نقوی نے امریکی صدر ڈونلڈ ٹرمپ کی عالمی امن کے لیے کاوشوں کو سراہتے ہوئے کہا کہ ٹرمپ نے پاک – بھارت سمیت 4 جنگیں رکوا کر انسانیت کی عظیم خدمت کی ہے۔ انہوں نے امید ظاہر کی کہ روس – یوکرین تنازع اور غزہ میں بھی ٹرمپ کی جنگ بندی کی کوششیں بار آور ہوں گی۔

پاک – امریکا تعلقات میں گرمجوشی

محسن نقوی نے کہا کہ حالیہ تاریخ میں کوئی دوسرا لیڈر ایسا نہیں جس نے ہزاروں انسانوں کو تباہی سے بچایا ہو۔ ان کا کہنا تھا کہ ٹرمپ کے دور میں پاک – امریکا تعلقات میں وسعت اور نئی گرمجوشی آئی۔ پاکستان عالمی امن کے لیے اٹھائے گئے ہر مثبت اقدام کا خیر مقدم کرتا ہے۔

امریکی سفیر کا پاکستان کو اہم دوست قرار دینا

قائم مقام امریکی سفیر نیٹلی بیکر نے اس موقع پر کہا کہ پاکستان امریکا کا ایک اہم دوست ملک ہے اور واشنگٹن اسلام آباد کے ساتھ تعلقات کو خصوصی اہمیت دیتا ہے۔