دبئی لینڈ ڈیپارٹمنٹ پاکستانیوں کی جائیدادوں کی تفصیلات فراہم کرنے پر آمادہ

اسلام آباد: پاکستان سے پیسہ لوٹ کر بیرون ملک اثاثے بنانے والوں کے گرد گھیرا تنگ ہونے لگا ہے، دبئی لینڈ ڈیپارٹمنٹ میں وہاں جائیدادیں بنانے والے پاکستانیوں کی تفصیلات فراہم کرنے پر آمادگی ظاہر کردی ہے۔

 فیڈرل بورڈ آف ریونیو (ایف بی آر) اور دبئی لینڈ ڈیپارٹمنٹ کے درمیان مذاکرات کے بعد دبئی حکام نے ایف بی آر کو پراپرٹیز کے پاکستانی مالکان کی تفصیلات فراہم کرنے پرآمادگی ظاہر کر دی۔

چیئرمین ایف بی آر شبر زیدی نے کہا ہے کہ پاکستانی اور دبئی حکام کے درمیان 9 اور 10 اکتوبر کو مذاکرات ہوئے جو نتیجہ خیز اور بارآور رہے، انہوں نے کہا کہ ان مذاکرات کا مقصد دبئی میں پراپرٹیز کے پاکستانی مالکان کی معلومات تک رسائی حاصل کرنا تھا۔

شبر زیدی نے کہا کہ دبئی لینڈ ڈیپارٹمنٹ کے حکام دبئی میں موجود جائیدادوں کے پاکستانی مالکان کی تفصیلات فوری دیں گے۔ علاوہ ازیں اقامے کے غلط استعمال کو بھی روکنے سے متعلق پاکستانی اور دبئی حکام مشترکہ کارروائی کی جانب پیش رفت کریں گے۔