بلوچستان کے 13 اضلاع میں 3 روزہ انسداد پولیو مہم کا 4 نومبر سے آغاز

کوئٹہ: بلوچستان کے 13 اضلاع میں 3 روزہ انسداد پولیو مہم چار نومبر سے شروع ہو رہی ہے۔ جس کے دوران 13 لاکھ بچوں کو پولیو سے بچاؤ کے قطرے پلائے جائیں گے۔

ایمرجنسی آپریشن سینٹر بلوچستان کے کوارڈینیٹر راشد رزاق کے مطابق کوئٹہ سمیت 13 اضلاع میں انسداد پولیو مہم پیر سے شروع ہوگی، نصیرآباد، جعفرآباد، جھل مگسی، صحبت پور، ڈیرہ بگٹی، سبی، لورالائی، دکی، ہرنائی، زیارت، کوئٹہ، پشین اور قلعہ عبداللہ میں موذی مرض سے بچاؤ کے لئے بچوں کو قطرے پلائے جائیں گے۔

پولیو مہم کے دوران پانچ سال تک کی عمر کے 13 لاکھ سے زائد بچوں کو پولیو سے بچاؤ کے قطرے پلانے کا ہدف مقرر کیا ہے۔ مہم کے دوران 7 ہزار 481 کے قریب ٹیمیں حصہ لیں گی جن میں 4 ہزار 547 موبائل ٹیمیں، 450 فکسڈ سائیڈ اور 444 ٹرانزٹ ٹیمیں شامل ہوں گی۔

 واضح رہے کہ صوبے میں رواں سال پولیو کے 7 کیسز سامنے آئے ہیں۔ 3 قلعہ عبداللہ، 2 جعفر آباد جبکہ ایک کوئٹہ اور ایک ہرنائی سے رپورٹ ہوئے ہیں جس کی بنیاد پر پولیو کی خصوصی مہم شروع کی جا رہی ہے۔