33 ویں نیشنل گیمز کا آغاز۔۔۔۔ پشاور میں رنگا رنگ افتتاحی تقریب

پشاور: ملک میں کھیلوں کے سب سے بڑے مقابلے نیشنل گیمز کا پشاور میں آغاز ہو گیا،مقابلوں میں 10 ہزار کھلاڑی حصہ لے رہے ہیں۔

33 ویں نیشنل گیمز کا قیوم اسپورٹس کمپلیکس پشاور میں آغاز ہوا۔ وزیراعلی خیبر پختونخواہ محمود خان نے کھیلوں کے قومی مقابلوں کا افتتاح کیا۔ رنگا رنگ تقریب میں آتش بازی کا شاندار مظاہرہ کیا گیا۔

نیشنل گیمز کی افتتاحی تقریب میں کورکمانڈر شاہین مظہر، سینئر صوبائی وزیر عاطف خان بھی موجود تھے۔ گیمز میں چاروں صوبوں کے علاوہ آزاد کشمیر، گلگت بلتستان اور اسلام آباد کی ٹیمیں حصہ لے رہی ہیں۔

سابق اولمپئین  قاضی صلاح الدین نے شمع روشن کی اور ٹیموں نے مارچ پاسٹ کیا۔ ایس ایس جی کمانڈوز نے دس ہزار فٹ کی بلندی سے پیراشوٹ کے ذریعے اسٹیڈیم میں اترنے کا مظاہرہ جب کہ اسکول کی بچیوں نے قومی نغمہ پیش کیا۔

نامور گلوکار سلمان احمد نے بھی دل دل پاکستان نغمہ پیش کر کے اسٹیڈیم میں موجود لوگوں کا لہو گرمایا۔ نیشنل گیمز میں 60 کھیلوں کو شامل کیا گیا ہے جن میں دس ہزار کھلاڑی اور ساڑھے چھ ہزار اتھلیٹ شرکت کررہے ہیں۔