مودی کا اقلیتوں اورکشمیریوں کی شناخت مٹانے کا خواب پورا نہیں ہوگا،وزیراعظم

اسلام آباد: وزیراعظم عمران خان نے کہا ہے کہ مودی سرکار کا اقلیتوں اورکشمیریوں کی شناخت مٹانے کا خواب پورا نہیں ہوگا، پاکستان کشمیری بھائیوں کی اخلاقی،سیاسی اورسفارتی حمایت جاری رکھے گا۔

وزیرِاعظم عمران خان سے معروف کشمیری کارکن ٹونی ایشاء نے اسلام آباد میں ملاقات کی۔ جس میں مقبوضہ کشمیر میں بھارتی ظلم وستم، انسانی حقوق کی سنگین خلاف ورزیوں پربات چیت کی گئی۔

ٹونی ایشاء نے کہا کہ مقبوضہ کمشیر کی عوام کشمیر کا مسئلہ عالمی سطح پر اجاگر کرنے اور بھارتی جبر و ستم اور خطے پر اس کے مہلک اثرات کے بارے میں اقوام عالم کی توجہ دلانے کے سلسلے میں وزیرِاعظم عمران خان کی  مسلسل کوششوں پر تہہ دل سے شکر گزار ہیں۔

ٹونی ایشاء کا کہنا تھا کہ وزیرِاعظم عمران خان کی جانب سے اقوام متحدہ سمیت ہر فورم پرکشمیر کا مسئلہ اٹھانے سے جہاں یہ مسئلہ عالمی سطح پر اجاگر ہوا ہے وہاں مودی سرکارکا آر ایس ایس کی فلاسفی پر مبنی ایجنڈا اور بھارت کی نام نہاد جمہوریت کا پردہ فاش ہوا ہے۔

ٹونی ایشاء نے وزیرِ اعظم کو امریکہ میں  خصوصاً امریکی سینٹرز اور کانگریس کے اراکین کے سامنے مسئلہ کشمیر اجاگر کرنے  کے حوالے سے اپنی کوششوں سے بھی آگاہ کیا۔

اس موقع پر وزیراعظم عمران خان کا کہنا تھا کہ پاکستانی عوام اور حکومت معصوم کشمیریوں کے حقوق اور کشمیر کا مقدمہ ہر فورم پر اٹھانے اور ان کی آواز بننے کے لئے پرعزم ہیں، عالمی برادری کو مودی سرکار کے ایجنڈے اور خطے کے امن پر اس کے مہلک اثرات کا ادراک کرنا ہوگا

آر ایس ایس اورہندتوا نظریات پر مبنی ایجنڈے کے تحت مودی سرکار نہ صرف کشمیریوں بلکہ بھارت میں بسنے والے کروڑوں عوام کی شناخت مٹانے کی خواہاں ہے، لیکن مودی سرکار کا یہ خواب کبھی شرمندہ تعبیر نہیں ہوگا،پاکستان کشمیری بھائیوں کی اخلاقی، سیاسی اور سفارتی حمایت جاری رکھیں گے۔