خطرناک کروناوائرس کی پاکستان منتقلی کا خطرہ، حکومت کا ہنگامی اقدامات کا فیصلہ

اسلام آباد: وزارت قومی صحت نے چین کے خطرناک کرونا وائرس سے پاکستان کے متاثر ہونے کے خطرے کے پیش نظر سینٹرل ہیلتھ سٹیبلشمنٹ کو اقدامات کرنے کی ہدایت کر دی ہے۔

اس خطرناک وائرس سے چین میں 1700 سے زائد کیسز رپورٹ ہوئے اور ابھی تک تین اموات ہو چکی ہیں۔ کرونا وائرس کی روک تھام کیلئے عالمی ادارہ صحت کا ہنگامی اجلاس جنیوا میں ہو رہا ہے۔

وزارت قومی صحت کی جانب سے جاری ایڈوائزری میں کہا گیا ہے کہ متاثرہ ممالک سے کرونا وائرس دیگر ممالک میں منتقل ہونے کا خدشہ ہے۔ چین میں کرونا وائرس مچھلی اور گوشت منڈی میں کام کرنے یا متواتر جانے والوں کو لاحق ہوا۔اس خطرناک وائرس کی علامات میں بخار، کھانسی اور سانس لینے میں دشواری شامل ہیں۔ یہ وائرس متاثرہ جانور یا حاصل شدہ غذا سے انسان میں منتقل ہو کر پھیپھڑوں کو شدید متاثر کرتا ہے۔

وزارت قومی صحت کے مطابق دنیا میں کرونا وائرس کی ویکسین تاحال دستیاب نہیں، اس سے بچاؤ کا واحد حل بروقت احتیاطی تدابیر ہیں۔ یہ وائرس چین کے علاوہ جاپان، جنوبی کوریا اور تھائی لینڈ میں بھی پایا گیا ہے۔چین سے پاکستان آنے جانے والوں کا طبی معائنہ کیا جائے گا۔ حکومت نے اس کے سدباب اور بچاؤ کیلئے ائیرپورٹس پر بھی خصوصی کاونٹر بنانے کا فیصلہ کیا ہے۔