نوازشریف خود آئیں ورنہ شاہی سواری کے ذریعے پاکستان لانے کا آپشن موجود ہے، مراد سعید

اسلام آباد: وفاقی وزیر برائے مواصلات و پوسٹل سروسز مراد سعید کا کہنا ہے کہ نواز شریف خود پاکستان آئیں ورنہ شاہی سواری کے ذریعے انہیں واپس لانے کا آپشن موجود ہے۔

اپوزیشن لیڈر شہباز شریف کے بیان پر ردعمل دیتے ہوئے وفاقی وزیر مراد سعید نے کہا کہ چھوٹے میاں صاحب اِدھر اُدھر کی باتیں کرنے کی بجائے بتائیں کہ وہ اور ان کے بڑے بھائی واپس کب آرہے ہیں؟ جیسے آپ کے دفتر سے چوری میں ملوث کارندے ڈھونڈ ‏نکالے ایسے آٹا چینی کی قلت پیدا کرنے والوں تک بھی پہنچ جائیں گے۔

مراد سعید کا کہنا تھا کہ قوم کو اچھے سے یاد ہے کہ کیسے شریف برادران نے کمیشن ٹھکانے لگانے کیلئے نثار احمد گل ‏کو اپنے دفتر میں ڈائریکٹر پولیٹیکل افیئرز لگایا، وقارٹریڈنگ کمپنی، مقصود اینڈ کمپنی اور مشتاق اینڈ کمپنی ‏کے ذریعے جو عوام میں مفت چینی، آٹا، دالیں اور گھی وغیرہ مفت تقسیم کئے قوم کو ‏اس کا بھی بتائیں۔

وفاقی وزیر مواصلات کا کہنا ہے کہ چھوٹے میاں صاحب! فرزند زرداری بھی آپ کی اور بڑے میاں کی یاد میں اداس اور ‏دل گرفتہ ہیں، مولانا کو بھی آپ کی یاد شدت سے ستا رہی ہے اور تمام اپوزیشن ایڑھیاں ‏اٹھائے آپ کی راہ تک رہی ہے۔

اپوزیشن لیڈر کو مخاطب کرتے ہوئے مراد سعید نے کہا ہے کہ بھاشن فرمانے کا شوق دل میں انگڑائیاں لے رہا ہے تو قومی اسمبلی میں تشریف لائیے، ‏آپ کے منتظر ہیں، مراد سعید نے کہا کہ میاں صاحب خود تشریف لائیے وگرنہ “شاہی سواری” کے ذریعے واپسی کا آپشن بھی دستیاب ہے