کورناکی بگڑتی صورتحال:7 روز کیلئے مسافر ٹرین آپریشن مکمل بند کرنے کا فیصلہ

لاہور: پاکستان میں کورونا وائرس کی بگڑتی صورت حال کے باعث آج رات 12 بجے سے ملک بھر میں مسافر ٹرین 31 مارچ تک مکمل طور پر بند کرنے کا فیصلہ کیا گیا ہے۔

پاکستان ریلوے ہیڈ کوارٹر لاہور میں وزیر ریلوے شیخ رشید کی زیرصدارت ایک اہم اجلاس ویڈیو لنک کے ذریعے ہوا، جس میں چیئرمین ریلوے حبیب الرحمان، سی ای او ریلوے دوست علی لغاری، چیف آپریٹنگ آفیسر عامر بلوچ سمیت دیگر افسران نے شریک ہوئے۔

 اجلاس میں آج رات 12 بجے سے ملک بھر میں مسافر ٹرین آپریشن آئندہ 7 روز کے لیے مکمل طور پر بند کرنے کا فیصلہ کیا گیا ہے تاہم صرف مال بردار ٹرینیں ہی چلیں گی جب کہ ٹرین آپریشن بند ہونے کے باوجود ملازمین کی چھٹی نہیں ہوگی۔

وزارت ریلوے کی جانب سے جاری نوٹیفکیشن کے مطابق مسافر ریل گاڑیوں کا آپریشن آج رات 12 بجے سے 31 مارچ تک معطل کردیا گیا ہے، ٹکٹ بکنگ بھی بند کرنے کے احکامات جاری کیے گئے ہیں جب کہ جن مسافروں نے مختلف ٹرینوں سے بکنگ کروائی ہوئی تھی ان کو فل ری فنڈ دیا جائے گا۔