پاکستان میں 10 ماہ بعد مہنگائی میں نمایاں کمی۔۔۔ مہنگائی کی شرح 8.5 فیصد پر آگئی

اسلام آباد: دس ماہ بعد مہنگائی کی شرح میں نمایاں کمی ہوئی ہے۔ اپریل میں مہنگائی کم ہوکر 8 اعشاریہ 5 فیصد ہوگئی جب کہ رواں مالی سال کے پہلے 10 ماہ کے دروان مہنگائی کی شرح 11 اعشاریہ 2 فیصد رہی۔

ادارہ شماریات کےمطابق مارچ 2020 میں مہنگائی کی شرح 10 اعشاریہ 2 فیصد تھی جو اپریل 2020 میں کم ہوکر 8 اعشاریہ 5 فیصد پر آگئی۔جولائی تا اپریل کے دوران مہنگائی کی شرح گیارہ اعشاریہ دو فیصد رہی۔گذشتہ ایک ماہ میں شہری علاقوں میں پیاز کی قیمتوں میں 23فیصد،چکن 22 ، ٹماٹر11، تازہ دودھ 4.29، سبزیاں 4 فیصد اور گندم کی قیمتوں میں 3.29 فیصد کمی ہوئی۔

جب کہ ایک سال میں شہری علاقوں میں ٹماٹر 55 اورچکن29 فیصد سستا ہوا، بجلی قیمتوں میں 6 فیصد کمی ہوئی۔ جب کہ تازہ پھل18فیصد، انڈے 15فیصد، دال مسور 28فیصد، دال مونگ23فیصد، دال ماش14، دال چنا11، بیسن 8 اور چینی 2.55فیصد مہنگی ہوئی۔

ادارہ شماریات کے مطابق اپریل 2019 سے اپریل 2020 کے دوران شہری علاقوں میں دال مونگ 101 فیصد، آلو92، دال ماش 68، دال مسور47، انڈے44، پیاز41، دال چنا31، بیسن29اور چینی 27فیصد مہنگی ہوئی۔ اس دوران گھی کی قیمتوں میں 26فیصد، کوکنگ آئل22، گندم17، آٹا15، گوشت14فیصد اور ادویات کی قیمتوں میں 13فیصد اضافہ ہوا۔