وفاقی وزراء کے تحفظات، پی ٹی وی فیس 100 روپے کرنے پر عملدرآمد روک دیا گیا

اسلام آباد: بعض وزراء کی طرف سے پاکستان ٹیلی ویژن (پی ٹی وی) کی فیس میں اضافے پر تحفظات کے بعد وفاقی کابینہ نے یہ معاملہ مؤخر کر دیا۔

چند روز قبل وفاقی حکومت کی طرف سے پاکستان ٹیلی ویژن (پی ٹی وی) کی فیس 35 روپے سے بڑھا کر 100 روپے کر دی گئی تھی جس کے بعد ہر طرف شور مچا ہوا تھا اور حکومت سے اس اضافے کو فوری طور پر واپس لینے کا مطالبہ کیا گیا تھا۔ فیس کے اضافے پر ملکی سیاستدانوں نے بھی صدا بلند کی تھی اور حکومت پر کڑی تنقید کی تھی۔

ذرائع نے نیوز ڈپلومیسی کو بتایا کہ وزیراعظم عمران خان کی زیرصدارت وفاقی کابینہ کا اجلاس ہوا، اجلاس کے دوران بعض وزرا نے پاکستان ٹیلی ویژن (پی ٹی وی) کی فیس میں اضافے پر اعتراض کر دیا۔ جس کے بعد پی ٹی وی کی فیس 35 روپے سے بڑھا کر 100 روپے کرنے کے اضافے کا معاملہ مؤخر کر دیا ہے اور عوام کو اعتماد میں لیے جانے تک فیصلے پر عملدرآمد روک دیا جائے گا۔

جن وزراء نے پی ٹی وی فیس بڑھانے کی مخالفت کی ان میں وفاقی وزیر سائنس و ٹیکنالوجی فواد چودھری، وفاقی وزیر برائے آبی وسائل فیصل واوڈا، وفاقی وزیرمراد سعید اور شیریں مزاری شامل تھے،ان کا کہنا ہے کہ معاملہ باقاعدہ کابینہ میں زیر بحث لانا چاہئے۔ کابینہ قومی اسمبلی کی منظوری کے بغیر اس طرح کا ٹیکس یا لیوی نہیں عائد کر سکتی۔

وفاقی وزراء کا کہنا تھا کہ دو سال سے پاکستان ٹیلی ویژن (پی ٹی وی) اپنا بزنس پلان نہیں دے سکا۔ ایک سو دس نجی  ٹی وی چینلز کا مجموعی بجٹ 38 ارب روپے ہے، اکیلے پی ٹی وی کیلئے 22 ارب روپے کیوں چاہئیں؟