لاکھوں پاکستانی باہر بھجوانے کےانتظامات مکمل،حکومت تعاون کرے، سرفرازظہور

اسلام آباد: پاکستانیوں کو بیرون ممالک روزگار کے لئے بھجوانے والی رجسٹرڈ کمپنیوں کی پاکستان اوورسیز ایمپلائمنٹ پروموٹرز ایسوسی ایشن (پوئیپا) کے چیئرمین سرفراز ظہور چیمہ کا کہنا ہے کہ2 لاکھ پاکستانیوں کو بیرون ممالک روزگار کے لئے بھجوانے کے انتظامات کو حتمی دے دی گئی ہے، حکومت تعاون کرے تو ملکی ترسیلات زر میں سو فیصد اضافے کی ضمانت دیتے ہیں۔

اسلام آباد میں پریس کانفرنس کرتے ہوئے چیئرمین پوئیپا سرفراز ظہور چیمہ نے کہا کہ حکومت سے مطالبہ کیا کہ اوورسیز ایمپلائمنٹ کے شعبے کو باقاعدہ صنعت کا درجہ دیا جائے کیونکہ اوورسیز ایمپلائمنٹ پروموٹرز کی مدد سے لاکھوں افراد کو بیرون ممالک ملازمت دلواکرزرمبادلہ میں اربوں ڈالرزکااضافہ کیا جا سکتا ہے۔

انہوں نے بتایا کہ کورونا وباء کے باعث دو لاکھ پاکستانی بیرون ممالک نہیں جا سکے تھے جن کو بھجوانے کے لئے انتظامات کو حتمی شکل دے دی ہے حکومت افرادی قوت باہر بھجوانے کے حوالے سے ہمارے ساتھ مل کر حکمت عملی طے کرے ایک سال کے اندر ترسیلات زر میں سو فیصد اضافے کی ضمانت دیتے ہیں۔

انہوں نے کہا کہ ملک میں اقتصادی بحالی میں پاکستان کی اوورسیز ایمپلائمنٹ پروموٹرز برادری بنیادی کردار ادا کر رہی ہے، اگر حکومت اس شعبے کی سرپرستی کرے تو مختصر وقت میں لاکھوں لوگوں کو مختلف ممالک میں بھجوا کر زرمبادلہ میں اربوں ڈالرز کا اضافہ کر سکتے ہیں۔

انہوں نے کہا کہ حکومت نے سب شعبوں کی مدد کی مگر جس شعبے کا پاکستان کی معیشت میں کلیدی کردار ہے اسے نظر انداز کیا گیاہے۔ ہم نے ابھی تک ایک کروڑ کے قریب افرادی قوت بیرونی ممالک میں بھیج چکے ہیں۔ موجودہ حکومت کے دور میں ہم نے9 لاکھ سے زیادہ پاکستانیوں کو بیرونی ممالک میں ملازمتیں دلوائی ہیں۔ جس کا سارا کریڈٹ حکومت اپنے کھاتے میں ڈال رہی ہے۔

اپنی بات جاری رکھتے ہوئے سرفراز ظہور چیمہ نے کہا کہ موجودہ حکومت کی ناقص پالیسیوں کی وجہ سے قطر میں لاکھوں پاکستانیوں کو بھجوانے کا منصوبہ ناکام ہو گیا اگر یہی پالیسیاں جاری رہیں تو جاپان یورپ،گلف، آسٹریلیا، کینیڈا سمیت دیگر ممالک میں افرادی قوت بھجوانے کے مواقع بھی کھو دیں گے اور پاکستان کی جگہ بھارت، نیپال اور بنگلہ دیش فائدہ اٹھا لیں گے۔

انہوں نے حکومت سے مطالبہ کیا کہ اوورسیز ایمپلائمنٹ پروموٹرز کو باقاعدہ انڈسٹری کا درجہ دیا جائے، بیرون ملک لیبراتاشیوں کی تعیناتی کے لئے حکومت پاکستان کے لائسنس یافتہ اوورسیز ایمپلائمنٹ پروموٹرز اور ان کی نمائندہ تنظیم کو اعتماد میں لیا جائے۔ او پی ایف میں نمائندگی دی جائے اور فارن مشنز میں بیرون ملک کام کرنے والے ورکرز کے لئے الگ ڈیسک قائم کیا جائے۔

چیئرمین پوئیپا نےکہا کہ ہم لوگ پاکستان کے لئے قیمتی زرمبادلہ کا باعث بنتے ہیں سالانہ18 سے20ارب ڈالر زرمبادلہ کا ذریعہ بنتے ہیں اس سیکٹر کو اگر حکومت سہولیات اور عزت دے تو ہم بیرون ملک موجود مین پاور کو ڈبل کر سکتے ہیں اس مقصد کے لئے وزرات سمندر پار پاکستانی ومحنت و افرادی قوت منتخب باڈی پوئیپا کو اعتماد میں لے کر چلے کیونکہ اس کے پاس ایک مکمل لائحہ عمل موجود ہے۔

سرفراز ظہور چیمہ نے کہا کہ اس پریس کانفرنس کے ذریعے وزیراعظم پاکستان عمران خان اور ان کے مشیر ذلفی بخاری کو پیغام دیتے ہیں کہ وہ فی الفور ہمارے ساتھ بیٹھیں تاکہ نہ صرف بیرون ملک موجود پاکستانیوں کی ملازمتیں محفوظ بنائی جائیں بلکہ ان میں اضافہ بھی کیا جائے۔