سام سنگ پاکستان میں اپنا پہلا موبائل فونز اسمبلنگ پلانٹ لگائے گا، حماد اظہر

اسلام آباد: وفاقی وزیر برائے صنعت و پیداوار حماد اظہر نے کہا ہے کہ معروف ٹیکنالوجی کمپنی سام سنگ نے پاکستان میں پہلے موبائل فونز اسمبلنگ پلانٹ لگانے میں دلچسپی ظاہر کی ہے۔

سماجی رابطوں کی ویب سائٹ ٹویٹر پر جاری ایک بیان میں وفاقی وزیر حماد اظہر نے سام سنگ پاکستان کے ایم ڈی اور سی ای او سے ملاقات کی تفصیل شیئر کی اور لکھا کہ اسمارٹ فون کی پاکستان میں تیاری کے سلسلے میں ڈیوائس کی شناخت، رجسٹریشن اور بلاکنگ سسٹم(ڈی آئی آر بی ایس)  اور موبائل پالیسی وضع کرلی گئی ہے۔

وفاقی وزیر صنعت و پیداوار کی جانب سے ٹویٹر پیغام میں مزید لکھا گیا کہ کہ سام سنگ کے اعلیٰ حکام نے حکومتی پالیسی اور اقدامات کو سراہتے ہوئے پاکستان میں اپنے اسمارٹ فون اسمبلنگ پلانٹ کے قیام کے عمل کو تیز تر کرنے کا عندیہ بھی دیا ہے۔

اس سے پہلے ہواوے، نوکیا اور سام سنگ کے اعلیٰ حکام نے 30 جنوری کو ایف بی آر، پی ٹی اے اور انجینئرنگ ڈیویلپمنٹ بورڈ کے حکام سے ملاقات کے دوران پاکستان میں اپنے پلانٹس لگانے کی خواہش ظاہر کی تھی۔ پاکستان میں موبائل فون کی تیاری سے موبائل کی قیمتیں کم ہونے کا امکان ہے۔

خیال رہے کہ رواں برس مئی میں اقتصادی رابطہ کمیٹی نے پاکستان کی پہلی موبائل فون پالیسی کی منظوری دی تھی، یہ منظوری پاکستان ٹیلی کمیونیکیشن اتھارٹی کی جانب سے انٹرنیٹ آلے کی شناخت، رجسٹریشن اور بلاکنگ کے نظام (ڈی آئی آر بی ایس) کو متعارف کرانے کے بعد دی گئی تھی۔