وزیراعظم کا کراچی کو مسائل سے نکالنے کیلئے1100 ارب روپے کے پیکج کا اعلان

وزیراعظم عمران خان نے کراچی کو درپیش مسائل کے حل کے لیے 1100ارب روپے کے پیکج کا اعلان کردیا جس میں وفاقی اور صوبائی حکومت دونوں تعاون کریں گی۔

وزیراعظم ہاؤس کی طرف سے جاری تفصیلات کے مطابق کراچی ٹرانسفارمیشن پلان کے لیے 1113 ارب روپے جاری کیے جائیں گے جن میں سے شہر قائد میں فراہمی آب کے منصوبوں کے لیے 92 ارب روپے مختص کیے گئے ہیں۔وزیراعظم آفس کے مطابق سیوریج ٹریٹمنٹ پر 141 ارب روپے خرچ ہونگے۔

سولڈ ویسٹ مییجمنٹ، نکاسی آب کے لیے 267 ارب روپے مختص کیے گئے ہیں، سڑکوں کی بحالی اورنئی سٹرکوں کی تعمیر پر 41 ارب روپے خرچ کیے جائیں گے۔ شہر قائد کے لیے اعلان کردہ ماس ٹرانزٹ، ریل اور روڈ ٹرانسپورٹ کے لیے 572 ارب روپے مختص کیے گئے ہیں،

قبلں ازیں وزیراعظم نے کراچی کیلئے 1100 ارب روپے کے پیکج کا اعلان کرتے ہوئے کہا کہ کسی بھی مسئلے سے نمٹنے کیلئے کوآرڈی نیشن ضروری ہے، شہر قائد کے مسائل کے حل کیلئے عملدرآمد کمیٹی بنائی ہے، تمام فیصلے صوبائی رابطہ عملدرآمد کمیٹی کے فورم پر ہوں گے۔ میڈیا سے گفتگو کرتے ہوئے انہوں کہا کراچی کے مسائل کے حوالے سے تفصیلی گفتگو ہوئی، کراچی کے مسائل کو مستقل بنیادوں پر حل کریں گے۔

عمران خان کا کہنا تھا کہ کراچی میں بارشوں سے تباہی مچ گئی، بارشوں سے پہلے کورونا کا چیلنج تھا، کورونا وائرس کے حوالےمرحلہ بہت مشکل تھا،کورونا سے نمٹنے کیلئے ہم نے کمیٹی بنائی، ٹڈی دل کے چیلنج سے نمٹنے کیلئے بھی کمیٹی تشکیل دی گئی، بارشوں سے بلوچستان اور دیگر اضلاع متاثر ہوئے۔

وزیراعظم نے کہا کہ سیلاب نے بلوچستان، اندرون سندھ اور سوات میں تباہی مچائی، کراچی کے لوگوں نے مشکل وقت کا سامنا کیا، کراچی والوں کیلئے پینے کا پانی بڑا مسئلہ ہے، نالے، نکاسی آب، بے گھر افراد، سالڈویسٹ کے مسائل ہیں، شہر قائد میں ٹرانسپورٹ کے ساتھ سڑکوں کا بھی مسئلہ ہے، این ڈی ایم اے نالوں سے تجاوزات کا خاتمہ کر رہی ہے۔

اپنی بات جاری رکھتے ہوئے انہوں نے کہا کہ کراچی کی سڑکیں اور دیگر انفراسٹرکچر کا مسئلہ حل کرنا ضروری ہے، کراچی سرکلر ریلوے بھی مکمل کریں گے۔وزیراعظم نے کہا وزیراعلیٰ نے اندرون سندھ سیلاب کی تباہ کاریوں سے متعلق آگاہ کیا، ہم نے مل کر کورونا سے نمٹنے کیلئے اقدامات کیے، کراچی کے مسائل کے حل کیلئے بھی مل کر کام کریں گے۔