حکومت کا صوبوں کی مشاورت سے ملک بھر میں پرائمری سکول کھولنے کا فیصلہ

وفاقی حکومت نے کورونا کے باعث بند تعلیمی ادارے کھولنے کے حوالے سے تیسرے مرحلے میں پرائمری سکولوں میں 30 ستمبر سے تدریسی عمل شروع کرنے کا فیصلہ کیا ہے۔

وفاقی وزیرتعلیم و پیشہ وارانہ تربیت شفقت محمود نے معاون وزیراعظم کے خصوصی ڈاکٹر فیصل سلطان کے ہمراہ اسلام آباد میں نیوز کانفرنس کی۔  اس موقع پر ان کا کہنا تھا کہ نیشنل کمانڈ اینڈ آپریشن سینٹر (این سی او سی) اجلاس میں تمام صوبوں سے مشاورت کی گئی، آزاد کشمیر، گلگت بلتستان کے حکام بھی اجلاس میں شریک تھے۔

اپنی بات جاری رکھتے ہوئے شفقت محمود کا کہنا تھا کہ ملک میں تقریباً 3 کروڑ بچے پرائمری تعلیم حاصل کرتے ہیں، بدھ 30 ستمبر سے ملک بھر کے پرائمری سکول کھولنے اور تدریسی عمل شروع کرنے کا متفقہ فیصلہ ہوا ہے، تمام فیصلے ملک بھر سے جمع اعداد و شمار کو جانچنے اور صوبوں کی رائے لینے کے بعد کیے گئے۔

وفاقی وزیر تعلیم کا کہنا تھا ایس او پیز پر عملدرآمد نہ کرنے پر متعدد سکول بند کیے گئے، آئندہ بھی ایس او پیز پر عملدرآمد نہ کرنے والے سکولوں کیخلاف کارروائی کی جائے گی، چھوٹے بچے اب سکول آ رہے ہیں، ان کے لئے ماسک پہننا اور دیگر احتیاطی تدابیر پر عملدرآمد یقینی بنائیں۔