اسپیکر مشتاق غنی بھی جنسی زیادتی کے ملزمان کی سرعام سزا کے حق میں بول اٹھے

اسپیکرخیبر پختونخوا اسمبلی مشتاق احمد غنی نے کہاہے کہ چند ملزمان کو سرعام سزائیں دینے کی وجہ سے بچوں کے ساتھ جنسی تشدد کے واقعات میں نمایاں کمی آسکتی ہے۔

ان کا کہنا ہے کہ سپریم کورٹ فیصلے کے مطابق بچوں پر جنسی تشدد کے ملزمان کو سرعام سزائیں نہیں دے سکتے لیکن چند ملزمان کو سرعام سزائیں مل جائیں تو پھر بچوں پر تشدد کے کیسز رک سکتے ہیں، انہوں نے کہاکہ وزیراعظم عمران خان بھی چاہتے ہیں ایسے ملزمان کو سرعام سزائیں دی جائیں۔

اسپیکر پشاور اسمبلی کاکہنا تھاکہ سخت سزائیں تجویز کرنے کا مقصد بچوں کے ساتھ جنسی تشدد کے کیسز کو روکنے کے لیے خوف پیدا کرنا ہے، سعودی عرب میں بھی سخت سزائیں ہونے کی وجہ سے ایسے جرائم کم ہیں۔