کرکٹ دیوانوں کی عید ، 14 سال بعد جنوبی افریقہ کی کرکٹ ٹیم پاکستان آئے گی

جنوبی افریقی ٹیم پاکستان میں 2ٹیسٹ میچز اور 3ٹی 20انٹرنیشنل میچز کھیلنے پاکستان آئے گی۔ مہمان ٹیم سیریز میں شرکت کی غرض سے 16 جنوری کو کراچی پہنچے گی۔ سیریز کا پہلا ٹیسٹ میچ 26 سے 30 جنوری تک نیشنل اسٹیڈیم کراچی میں کھیلا جائے گا جبکہ دوسرا ٹیسٹ پنڈی کرکٹ اسٹیڈیم میں 4 سے 8 فروری تک کھیلا جائے گا۔ سیریز میں شامل دونوں ٹیسٹ میچز آئی سی سی ورلڈ ٹیسٹ چیمپین شپ کا حصہ ہوں گے۔

سیریز کے تینوں ٹی 20انٹرنیشنل میچز قذافی اسٹیڈیم لاہور میں 11, 13 اور 14 فروری کو کھیلے جائیں گے۔دورے میں شرکت کے لیے پاکستان پہنچنے والی جنوبی افریقی کی ٹیم اپنی قرنطینہ کی مدت کراچی میں مکمل کرے گی، جس کے بعد ٹریننگ سیشنز اور پریکٹس میچوں میں شرکت کی اجازت ہوگی۔

2007 کے بعد جنوبی افریقہ کی کرکٹ ٹیم کا یہ پہلا دورہ پاکستان ہوگا۔ دونوں ٹیموں نے2010 اور 2013 میں پاکستان کی ہوم سیریز نیوٹرل وینیو یعنی متحدہ عرب امارات میں کھیلیں تھیں۔1995 کے بعد سے لے کر اب تک دونوں ٹیموں کے درمیان کُل 11 ٹیسٹ سیریز کھیلی جا چکی ہیں۔ ان 11 میں سے 7 میں جنوبی افریقہ جبکہ 1میں پاکستان نے کامیابی حاصل کی۔