جی 20 ممالک نے پاکستان کی1 ارب 70 کروڑڈالرز قرض کی ادائیگی معطل کردی

مشکلات میں گھری پاکستانی معیشت کے لئے بڑی سہولت۔۔۔۔۔ دنیا کے امیر ممالک کے گروپ جی 20 نے کورونا وائرس سے پیدا صورت حال کے باعث پاکستان کے ذمے واجب الادا1 ارب 70 کروڑ ڈالرز کے قرض ادائیگی معطل کردی ہے۔

جی 20 ممالک کی طرف سے قرض معطلی کے لیے پاکستان نے فرانس، چین اور سوئٹزرلینڈ کے ساتھ ڈیٹ کی ری شیڈولنگ کے لئے معاہدے پر دستخط کردیے ہیں۔ پاکستان نے جی 20 ممالک کے ڈیٹ سروس کی معطلی کی سہولت سے فائدہ اٹھانے کے لئے مذاکرات کیے۔

اس سہولت کے تحت پاکستان کو 1 ارب 70 کروڑ ڈالرز کے قرض کی ادائیگی معطل رہے گی۔ پاکستان جی 20 ممالک سے مئی تا دسمبر 2020 کے عرصے کے لیے 1 ارب 8 کروڑ ڈالر کے قرض کی واپسی میں ریلیف کی توقع کررہا تھا۔

وزارت اقتصادی امور کے مطابق قرض کی اس رقم میں 1.47 ارب ڈالر قرض کی اصل رقم اور 32 کروڑ 30 لاکھ ڈالر کا سود شامل ہے۔ کورونا کے منفی معاشی اثرات سے محفوظ رکھنے کے لیے جی 20 ممالک ڈیٹ سروس کی معطلی کی سہولت کا آغاز کیا گیا تھا۔