چین نے سی پیک سے متعلق بھارتی میڈیا میں چلنے والی رپورٹس مسترد کردیں  

بیجنگ : چینی وزارتِ خارجہ نے حالیہ دنوں میں سی پیک سے متعلق بھارتی میڈیا میں چلنے والی رپورٹ کو مسترد کر دیا۔ چینی وزارت خارجہ کے ترجمان چاؤ لی نے کہا ہے کہ سی پیک منصوبے مثبت طور پر آگے بڑھ رہے ہیں۔کورونا وائرس کی عالمی وبا کے باوجود سی پیک کے تحت متعدد اہم منصوبوں پر نمایاں پیش رفت ہوئی ہے ۔

پاک چین اقتصادی راہداری کے بارے میں چین اور پاکستان کے غیر متزلزل عزم کا اعادہ کرتے ہوئے چاؤ لی نے کہا کہ سی پیک کو آگے بڑھانے کےلیے چین اور پاکستان کا عزم پختہ ہےاور سی پیک کا مستقبل روشن ہے۔

ان کا کہنا تھا کہ عالمی اقتصادی کساد بازاری کے باوجود سی پیک سمیت ’’دی بیلٹ اینڈ روڈ‘‘ پر چینی سرمایہ کاری میں کمی کے بجائے اضافہ ہوا ہے اور چین نے اس سے وابستہ ممالک کو اپنی صلاحیت کے مطابق مدد و معاونت فراہم کی ہے۔